प्रसंगावधान राखत ट्रकचालकाला मदत; वाहतूक सुरळीत करण्याच्या पोलिसांना सूचना

नाशिक, 23 ऑगस्ट (हिं.स.)।

: भिवंडी-कल्याण बायपासजवळ आज दुपारी १ वाजेच्या सुमारास वाहतूक करणाऱ्या एका ट्रकने अचानक पेट घेतल्याची घटना घडली. सुदैवाने ट्रकचालकाने प्रसंगावधान राखत वाहन रस्त्याच्या कडेला थांबविल्याने मोठा अनर्थ टळला. याचवेळी या मार्गावरून प्रवास करत असलेले राज्याचे मंत्री गिरीश महाजन यांच्या निदर्शनास ही घटना आली.

घटनेचे गांभीर्य लक्षात येताच मंत्री महाजन यांनी क्षणाचाही विलंब न करता आपले वाहन थांबवून स्वतः घटनास्थळी धाव घेतली. त्यांनी ट्रकचालकाची विचारपूस करून त्याला सुरक्षित अंतर राखण्यासह आग विझविण्यासाठी आवश्यक त्या उपाययोजना करण्याच्या सूचना केल्या. तसेच परिस्थिती नियंत्रणात आणण्यासाठी संबंधित यंत्रणेशी तातडीने संपर्क साधून मदतीसाठी आवश्यक निर्देश दिले.

दरम्यान, ट्रकला आग लागल्याने या मार्गावरील वाहतुकीवर परिणाम होण्याची शक्यता लक्षात घेऊन मंत्री महाजन यांनी वाहतूक पोलिसांनाही तातडीने वाहतूक सुरळीत करण्याच्या सूचना दिल्या. त्यांच्या तत्पर हस्तक्षेपामुळे परिस्थिती वेळीच नियंत्रणात आणण्यात आली.

संकटाच्या प्रसंगी घटनास्थळी पोहोचून नागरिकांना मदतीचा हात देण्याची मंत्री गिरीश महाजन यांची कार्यपद्धती पुन्हा एकदा अधोरेखित झाली. प्रशासनातील अधिकारी म्हणून नव्हे, तर एक जबाबदार लोकप्रतिनिधी म्हणूनही संकटसमयी नागरिकांच्या मदतीला धावून जाणे, हा त्यांच्या ‘संकटमोचक’ या ओळखीचा प्रत्यय देणारा प्रसंग ठरला.

ट्रकचालकाने वेळीच प्रसंगावधान राखले आणि मंत्री महाजन यांनी तत्काळ मदतीसाठी धाव घेतल्याने संभाव्य मोठी दुर्घटना टळली.

---------------

हिंदुस्थान समाचार / MANAS CHANDRASHEKHAR GOSAVI