काठमांडू, 24 ऑगस्ट (हिं.स.)।नेपाळची पहिली आधुनिक रस्ते बोगदा म्हणून ओळखली जाणारी ‘नागढुंगा पैसेज’ सोमवारी सर्वसामान्य नागरिकांसाठी खुली करण्यात आली. हा बोगदा काठमांडूला देशातील इतर जिल्ह्यांशी जोडतो. बोगदा खुला झाल्यानंतर सध्या चाचणीच्या आधारावर छोट्या खासगी वाहनांना या मार्गाचा वापर करण्यास परवानगी देण्यात आली आहे.

नागढुंगा टनल रोड सेफ्टी युनिटचे उपप्रमुख कबिराज श्रेष्ठ यांनी सांगितले की, कार, जीप, व्हॅन आणि इतर हलक्या खासगी वाहनांना बोगद्यातून जाण्याची परवानगी देण्यात आली आहे. यापूर्वी हा बोगदा केवळ आपत्कालीन सेवांसाठी खुला होता. श्रेष्ठ यांनी सांगितले की, काठमांडूच्या पश्चिम भागात बांधण्यात आलेला हा बोगदा सकाळी ९ ते संध्याकाळी ६ वाजेपर्यंत सुरू राहणार आहे. चाचणीच्या कालावधीत नागरिकांकडून कोणतेही शुल्क आकारले जाणार नाही.२७ जुलै रोजी उद्घाटन करण्यात आलेला हा २.६८८ किलोमीटर लांबीचा बोगदा मार्ग जपान सरकार आणि जपान इंटरनॅशनल कोऑपरेशन एजन्सीच्या (JICA) आर्थिक आणि तांत्रिक मदतीने बांधण्यात आला आहे.

अधिकाऱ्यांनी बोगद्यात वाहतुकीसाठी कठोर नियम लागू केले आहेत. वाहनांचा वेग ताशी ४० किलोमीटर इतका मर्यादित ठेवण्यात आला आहे. वाहनांच्या हेडलाइट्स सुरू ठेवणे बंधनकारक आहे. तसेच बोगद्यात ओव्हरटेकिंग करण्यास मनाई करण्यात आली असून, वाहन थांबवणे किंवा पार्क करणेही प्रतिबंधित आहे. श्रेष्ठ म्हणाले, “आम्ही सध्या चाचणीच्या आधारावर बोगद्याचे संचालन सुरू केले आहे. पूर्ण क्षमतेने संचालन सुरू करण्याचा निर्णय परिस्थितीचा आढावा घेतल्यानंतर आणि बोगद्यातून प्रवास करताना चालकांना येणाऱ्या अडचणी तसेच त्यांच्या अनुभवांबाबतचा अभिप्राय घेतल्यानंतर घेतला जाईल.” त्यांनी सांगितले की, सुरक्षा पथक आणि टोल वसुलीचे पथक पूर्ण क्षमतेने संचालन सुरू करण्यासाठी तयारी करत आहे. तसेच CCTV प्रणालीच्या माध्यमातून बोगद्याच्या आतील हालचालींवर लक्ष ठेवले जात आहे.

या बोगद्याचे बांधकाम अधिकृतपणे ऑक्टोबर २०१९ मध्ये सुरू झाले होते आणि प्रकल्प पूर्ण होण्यासाठी जवळपास सात वर्षे लागली. हा प्रकल्प सुमारे २९ अब्ज नेपाळी रुपयांच्या खर्चातून उभारण्यात आला आहे.जपानने या प्रकल्पासाठी २१.५ अब्ज नेपाळी रुपयांची मदत केली असून, त्यामध्ये ५ अब्ज नेपाळी रुपयांच्या कर्जाचाही समावेश आहे. उर्वरित निधी नेपाळ सरकारने उपलब्ध करून दिला.

धाडिंग जिल्ह्यातील सिस्नेखोला आणि टुटीपाखा यांना जोडणाऱ्या या नागढुंगा बोगदा मार्गामुळे प्रवासाचा वेळ मोठ्या प्रमाणात कमी होण्याची अपेक्षा आहे.हा मार्ग व्यस्त नागढुंगा मार्गाला पर्यायी रस्ता उपलब्ध करून देणार आहे. या मार्गावर वाहतूक कोंडी आणि रस्त्यांची खराब अवस्था यामुळे काठमांडू आणि पश्चिम नेपाळमधील जिल्ह्यांदरम्यानची वाहतूक अनेकदा प्रभावित होत असते.

जपानच्या सहकार्याने उभारण्यात आलेल्या या प्रकल्पाला जेआयसीएचे अध्यक्ष अकिहिको तनाका यांनी ऐतिहासिक महत्त्वाचा प्रकल्प असल्याचे म्हटले आहे. काठमांडूला पश्चिम नेपाळ आणि भारताशी जोडणारा हा एक महत्त्वाचा प्रवेशमार्ग असल्याचेही त्यांनी सांगितले. हा बोगदा थेट भारताला जोडलेला नसला तरी, अधिकाऱ्यांच्या म्हणण्यानुसार, काठमांडूमध्ये येणाऱ्या सुमारे ६० ते ७० टक्के मालाची वाहतूक ज्या महत्त्वाच्या मार्गाने होते, त्या कॉरिडॉरला या बोगद्यामुळे अधिक बळकटी मिळणार आहे. हा कॉरिडॉर बीरगंज-रक्सौल यांसारख्या भारत-नेपाळमधील प्रमुख व्यापारी मार्गांशी जोडलेला आहे.

---------------

हिंदुस्थान समाचार / Priyanka Bansode