वावरे (बेल्जियम), 29 ऑगस्ट (हिं.स.) : हॉकी विश्वचषकात आठव्या स्थानासाठीच्या सामन्यात भारताने जागतिक क्रमवारीत दुसऱ्या क्रमांकावर असलेल्या बेल्जियमला कडवी झुंज दिली. पण पेनल्टी शूटआऊटमध्ये ३-४ ने पराभव पत्करावा लागला. निर्धारित वेळेच्या अखेरीस दोन्ही संघ ३-३ असे बरोबरीत होते. भारताचा कर्णधार, हरमनप्रीत सिंगने अंतिम शिट्टी वाजण्याच्या अवघ्या २६ सेकंद आधी पेनल्टी कॉर्नरचे गोलमध्ये रूपांतर करून सामना शूटआऊटमध्ये नेला. या विश्वचषकातील हरमनप्रीतचा हा आठवा गोल होता. तथापि, बेल्जियमने शूटआऊटमधील दबाव अधिक चांगल्या प्रकारे हाताळला आणि ४-३ ने विजय मिळवला.

भारतासाठी शिलानंद लाक्रा, दिलप्रीत सिंग आणि अभिषेक यांनी गोल केले, तर हरमनप्रीत सिंग आणि सुखजीत सिंग यांना गोल करण्यात अपयश आले. बेल्जियमसाठी टॉम बून, आर्थर डी स्लुयव्हर, अलेक्झांडर हेंड्रिक्स आणि रोमन डुवेकोट यांनी गोल केले, तर व्हिक्टर फॉबर्टचा प्रयत्न चुकला.

भारताने आक्रमकपणे सामन्याची सुरुवात केली आणि सहाव्या मिनिटाला अभिषेकच्या गोलने आघाडी घेतली. सर्कलच्या आतून अभिषेकने मारलेला शॉट बेल्जियन गोलकीपरच्या पॅडला लागून गोलमध्ये गेला. त्यानंतर बेल्जियमने अथक दबाव टाकला. पहिल्या क्वार्टरमध्ये त्यांना तीन पेनल्टी कॉर्नर मिळाले, पण भारतीय गोलकीपर सूरज करकेराने काही उत्कृष्ट बचाव केले. मात्र, ११व्या मिनिटाला भारताला मोठा धक्का बसला. कर्णधार हरमनप्रीतला मैदानात जास्त खेळाडू ठेवल्याबद्दल पिवळे कार्ड दाखवण्यात आले आणि त्याला पाच मिनिटे बाहेर बसावे लागले.

दुसऱ्या क्वार्टरमध्ये बेल्जियमने सामन्याचे चित्र पालटले. २२व्या मिनिटाला रोमेन डुवेकोटने बरोबरी साधली. पुढच्याच मिनिटाला ह्यूगो लॅबुशेरने एका शानदार ड्रॅग फ्लिकने पेनल्टी कॉर्नरचे गोलमध्ये रूपांतर करून बेल्जियमला २-१ अशी आघाडी मिळवून दिली. पहिल्या हाफमध्ये बेल्जियमचे वर्चस्व स्पष्टपणे दिसून आले.

भारताने तिसऱ्या क्वार्टरची शानदार सुरुवात केली. ब्रेकनंतर, हरमनप्रीतने एका शक्तिशाली ड्रॅग फ्लिकने पेनल्टी कॉर्नरचे गोलमध्ये रूपांतर करून स्कोअर २-२ असा बरोबर केला. बेल्जियमने या गोलवर रेफरल घेतला, पण व्हिडिओ रिव्ह्यूनंतर भारताचा गोल वैध ठरवण्यात आला. त्यानंतर बेल्जियमने गोल केला, पण भारताच्या रेफरलमुळे तो गोल रद्द करण्यात आला. त्यानंतर भारतीय संघ आघाडी घेण्याच्या अगदी जवळ पोहोचला होता, पण अभिषेकचा शॉट एका डिफेंडरच्या स्टिकला लागून बाहेर गेला.

चौथ्या क्वार्टरमध्ये भारताच्या अडचणी वाढल्या. लॅबुशेअरच्या जोरदार शॉटचा फटका मनप्रीत सिंगच्या चेहऱ्यावर बसला आणि त्याला मैदान सोडावे लागले. त्याच्या दुखापतीमुळे भारतीय संघासाठी चिंता वाढली, तरीही तो नंतर शूटआऊट दरम्यान परतला. त्यानंतर थोड्याच वेळात, निकोलस डी कार्पेलने बेल्जियमचा तिसरा गोल केला. व्हिडिओ अंपायरच्या रिव्ह्यूनंतर हा गोल वैध ठरवण्यात आला आणि बेल्जियमने ३-२ अशी आघाडी घेतली. आता भारताकडे फक्त काही मिनिटे शिल्लक होती.

भारताने शेवटच्या तीन मिनिटांत गोलकीपरला बाहेर काढले, एक अतिरिक्त खेळाडू मैदानात उतरवला आणि पूर्ण ताकदीने हल्ला चढवला. अंतिम शिट्टी वाजण्याच्या २६ सेकंद आधी भारताला पेनल्टी कॉर्नर मिळाल्याने संघाला याचा फायदा झाला. कर्णधार हरमनप्रीत सिंगने पुन्हा एकदा सूत्रे हाती घेतली आणि चेंडू गोलमध्ये टाकून स्कोअर ३-३ असा बरोबर केला. सामना शूटआऊटमध्ये गेला, पण बेल्जियमने बाजी मारली.

---------------

हिंदुस्थान समाचार / वृषाली देशपांडे