परभणी, ३१ ऑगस्ट (हिं.स.) : मध्य रेल्वेच्या पुणे विभागातील हडपसर-पुणे तिसऱ्या रेल्वेमार्गाच्या कार्यान्वयनासाठी पूर्व-अंतर्गत सिग्नल जोडणी आणि अंतर्गत सिग्नल जोडणीची कामे करण्यात येणार आहेत. या कामांमुळे नांदेड विभागातून धावणाऱ्या काही गाड्यांच्या परिचालनावर परिणाम होणार असून, काही गाड्या विलंबाने धावणार आहेत. तसेच एका गाडीच्या सुटण्याच्या वेळेत पुनर्नियोजन करण्यात आले आहे.
आगामी २ ऑक्टोबर २०२६ रोजी गाडी क्रमांक ११४१० निजामाबाद-पुणे एक्स्प्रेस पटास-उरुळी विभागात सुमारे एक तास ३० मिनिटे उशिराने धावणार आहे. याचप्रमाणे २२ सप्टेंबर २०२६ रोजीही ही गाडी पटास-उरुळी विभागात सुमारे एक तास ३० मिनिटे नियंत्रित करण्यात येणार आहे.
गाडी क्रमांक ११४०६ अमरावती-पुणे एक्स्प्रेस १९ आणि २१ सप्टेंबर २०२६ रोजी दौंड-उरुळी विभागात आवश्यकतेनुसार विलंबाने धावणार आहे. तर गाडी क्रमांक १७६१३ पनवेल-नांदेड एक्स्प्रेस २० सप्टेंबर आणि ४ ऑक्टोबर २०२६ रोजी चिंचवड-खडकी विभागात आवश्यकतेनुसार उशिराने धावणार आहे.
दरम्यान, गाडी क्रमांक ११४०६ अमरावती-पुणे एक्स्प्रेसच्या ३ ऑक्टोबर २०२६ रोजीच्या सुटण्याच्या वेळेतही बदल करण्यात आला आहे. ही गाडी अमरावती स्थानकावरून नियोजित सायंकाळी ७.५० वाजता सुटण्याऐवजी तीन तास उशिराने रात्री १०.५० वाजता सुटणार आहे.
रेल्वे मार्गाच्या कामांमुळे गाड्यांच्या वेळापत्रकात होणाऱ्या या बदलांची प्रवाशांनी नोंद घ्यावी. प्रवास करण्यापूर्वी गाड्यांची अद्ययावत वेळ राष्ट्रीय रेल्वे चौकशी प्रणाली, रेलवन अनुप्रयोग, अधिकृत रेल्वे संकेतस्थळ किंवा हेल्पलाइन क्रमांक १३९ वरून तपासून घ्यावी, असे आवाहन दक्षिण मध्य रेल्वेच्या नांदेड विभागाच्या वतीने करण्यात आले आहे.
----------------------
हिंदुस्थान समाचार / Chaitanya JayantRao Chitnis
