मुंबई, 04 ऑगस्ट, (हिं.स.)। पुणेस्थित ऊर्जा-कार्यक्षम मेकॅट्रॉनिक्स क्षेत्रातील अग्रगण्य कंपनी मॅटेल मोशन अँड एनर्जी सोल्यूशन्सने सिरीज-बी गुंतवणूक फेरीत तब्बल १३० कोटी रुपयांचा निधी उभारल्याची घोषणा केली आहे. क्लायमेट सोल्यूशन्स आणि आर्थिक सेवांमध्ये गुंतवणूक करणाऱ्या यूसी इम्पॉवर या अर्ली-ग्रोथ स्टेज फंडच्या नेतृत्वाखाली ही गुंतवणूक झाली असून कॅटामारन हे नवीन प्रमुख गुंतवणूकदार या फेरीत सहभागी झाला आहे. तसेच विद्यमान गुंतवणूकदार ट्रान्झिशन व्हीसीनेही कंपनीवरील विश्वास कायम ठेवत पुन्हा गुंतवणूक केली आहे.

२०१७ मध्ये स्थापन झालेली मॅटेल मोशन अँड एनर्जी सोल्यूशन्स ही कंपनी ऊर्जा-कार्यक्षम, सानुकूल करता येणाऱ्या मोटर्स, मोटर कंट्रोलर्स आणि एकात्मिक पॉवरट्रेन विकसित व उत्पादन करते. कंपनीचे तंत्रज्ञान इलेक्ट्रिक वाहने, पंपिंग, कूलिंग सिस्टिम्स तसेच ऑटोमोटिव्ह आणि औद्योगिक क्षेत्रातील विविध अनुप्रयोगांसाठी वापरले जाते. विशेष म्हणजे, मॅग्नेटविरहित मोटर तंत्रज्ञान विकसित करण्यात कंपनी आघाडीवर असून त्यामुळे पुरवठा साखळीवरील अवलंबित्व कमी करण्यास मदत होत आहे. भारतात आयई-५ अल्ट्रा-हाय एफिशियन्सी औद्योगिक मोटर्स सादर करणारी कंपनी म्हणूनही मॅटेलने आपली वेगळी ओळख निर्माण केली आहे. सध्या कंपनी आयई-६ तंत्रज्ञान विकसित करण्यावरही काम करत आहे. दुचाकी, तीनचाकी आणि औद्योगिक क्षेत्रातील अनेक ओरिजिनल इक्विपमेंट मॅन्युफॅक्चरर्ससोबत कंपनीचे सिरीज उत्पादन सुरू आहे.

कंपनीचे संस्थापक आणि मुख्य कार्यकारी अधिकारी सुनिल पटेल तसेच सहसंस्थापक नेताजी पात्रो यांच्या नेतृत्वाखाली मॅटेलने अल्पावधीत उल्लेखनीय प्रगती केली आहे. सुनिल पटेल यांनी यापूर्वी बजाज ऑटोमध्ये चेतक इलेक्ट्रिक वाहन प्रकल्पाचे संशोधन आणि विकास प्रमुख म्हणून काम केले आहे, तर नेताजी पात्रो यांनी मारुती सुझुकी आणि बजाज ऑटोमध्ये संशोधन व विकास क्षेत्रात महत्त्वाची जबाबदारी सांभाळली आहे.

उभारण्यात आलेला नवीन निधी उत्पादन क्षमता वाढविणे, संशोधन आणि विकास सुविधा अधिक सक्षम करणे, नवीन उत्पादने विकसित करणे आणि अत्याधुनिक उत्पादन यंत्रणेचा विस्तार करण्यासाठी वापरण्यात येणार आहे. याशिवाय इलेक्ट्रिक कमर्शियल वाहन क्षेत्रात प्रवेश करण्याबरोबरच आंतरराष्ट्रीय बाजारपेठेत विस्तार करून जागतिक स्तरावर ग्राहकवर्ग वाढविण्याचीही कंपनीची योजना आहे.

या गुंतवणुकीमुळे भारतात विकसित होणाऱ्या ऊर्जा-कार्यक्षम तंत्रज्ञानाला नवी चालना मिळणार असून औद्योगिक आणि इलेक्ट्रिक मोबिलिटी क्षेत्रात मॅटेल मोशनची उपस्थिती अधिक मजबूत होण्याची अपेक्षा व्यक्त केली जात आहे. गुंतवणूकदारांनीही कंपनीच्या अभियांत्रिकी कौशल्यावर, संशोधन क्षमतेवर आणि जागतिक स्तरावरील विस्तारक्षमतेवर विश्वास व्यक्त करत भविष्यातील वाढीबाबत सकारात्मक भूमिका मांडली आहे.

---------------

हिंदुस्थान समाचार / Suraj Chaugule