* प्रीमियममध्ये वार्षिक आधारावर २३ टक्के वाढ; वाहन विम्यामध्ये २५ टक्के वाढ

मुंबई, 05 ऑगस्ट (हिं.स.) - श्रीराम जनरल इन्शुरन्स कंपनीने (SGI) आर्थिक वर्ष २०२६-२७ (FY27) ची दमदार सुरुवात केली असून, व्यवसायाच्या प्रमुख क्षेत्रांमध्ये उद्योगाच्या सरासरीपेक्षा चांगली कामगिरी केली आहे. कंपनीचा 'ग्रॉस डायरेक्ट प्रीमियम' (GDP) मागील वर्षाच्या याच तिमाहीतील ९६० कोटी रुपयांवरून २३ टक्क्यांनी वाढून २०२६-२७ च्या पहिल्या तिमाहीत १,१८० कोटी रुपयांवर पोहोचला. ही वाढ उद्योगाच्या ११ टक्के वाढीच्या दरापेक्षा लक्षणीयरीत्या अधिक होती.

SGI च्या व्यवसायाचा मुख्य आधार असलेल्या 'मोटर इन्शुरन्स' विभागाने पहिल्या तिमाहीत २५ टक्के वाढ नोंदवली—जी उद्योगाच्या १४ टक्के वाढीपेक्षा खूपच जास्त आहे. 'पर्सनल ॲक्सिडेंट' (वैयक्तिक अपघात विमा) पोर्टफोलिओमध्येही ४७ टक्क्यांची जोरदार वाढ झाली, जी उद्योगाच्या वाढीच्या दराशी बरोबरी करणारी आहे.

नफाक्षम वाढीवर SGI ने दिलेल्या भरचे सकारात्मक परिणाम दिसून येत आहेत. २०२६-२७ च्या पहिल्या तिमाहीत कंपनीचा निव्वळ नफा ५ टक्क्यांनी वाढून १३१ कोटी रुपये झाला; मागील वर्षीच्या याच तिमाहीत तो १२५ कोटी रुपये होता. जून २०२६ अखेर कंपनीचे 'सॉल्व्हन्सी रेशो' (आर्थिक सक्षमता प्रमाण) ३.०२ इतके होते. हे प्रमाण नियामक आवश्यकतेपेक्षा (१.५०) खूपच जास्त असून, कंपनीची मजबूत आर्थिक स्थिती दर्शवते.

'फायजिटल' (भौतिक आणि डिजिटल यांचा मेळ) मॉडेलअंतर्गत कंपनीच्या वितरण जाळ्याचा विस्तार हे या वाढीचे एक प्रमुख कारण ठरले. या तिमाहीत कंपनीने ५,१७६ नवीन आर्थिक सल्लागारांची (financial advisors) भर घातली. मागील वर्षाच्या याच कालावधीच्या तुलनेत ही ८ टक्के वाढ असून, यामुळे एकूण आर्थिक सल्लागारांची संख्या १,१०,१०२ वर पोहोचली आहे. कंपनीने आपली प्रत्यक्ष उपस्थिती (physical presence) देखील बळकट केली असून, शाखांची संख्या एका वर्षापूर्वीच्या २७९ वरून वाढून २९१ झाली आहे.

वाढता ग्राहक आधार: जून २०२६ पर्यंत सक्रिय पॉलिसींची संख्या ७२ लाखांवर पोहोचली, जी मागील वर्षीच्या याच कालावधीत ६८ लाख होती. ही वाढ कंपनीचा विस्तारणारा ग्राहक आधार आणि व्यवसायातील सातत्यपूर्ण प्रगती दर्शवते.

श्रीराम जनरल इन्शुरन्स कंपनीचे एमडी आणि सीईओ अनिल अग्रवाल म्हणाले, आम्ही आर्थिक सल्लागारांची (financial advisors) नेमणूक करून वितरण जाळ्याचा विस्तार करण्यासोबतच शिस्तबद्ध 'अंडररायटिंग'वर (जोखीम मूल्यमापन व स्वीकृती प्रक्रिया) लक्ष केंद्रित करत आहोत. यामुळे आम्हाला Q1 FY27 मध्ये उद्योगाच्या वाढीच्या दरापेक्षा चांगली कामगिरी करणे शक्य झाले आहे. शिवाय, दाव्यांची (claims) कार्यक्षमतेने पूर्तता करण्याच्या आमच्या कटिबद्धतेमुळे ग्राहकांचा विश्वास अधिक दृढ होतो.

श्रीराम जनरल इन्शुरन्सची योजना FY2030 पर्यंत आपल्या आर्थिक सल्लागारांची संख्या २ लाखांपर्यंत वाढवण्याची आहे. कंपनी आरोग्य विमा क्षेत्रातही हळूहळू आपली उपस्थिती मजबूत करत आहे.

प्रमुख व्यावसायिक विभागांमधील सातत्यपूर्ण प्रगती, मजबूत भांडवली स्थिती आणि वितरण जाळ्याच्या विस्तारासाठी केलेली विवेकी गुंतवणूक यांच्या जोरावर, भारतातील वाढत्या सामान्य विमा (general insurance) बाजारपेठेतील नवीन संधींचा लाभ घेण्यासाठी श्रीराम जनरल इन्शुरन्स सज्ज आहे. आपल्या दीर्घकालीन उद्दिष्टांच्या दिशेने वाटचाल करताना कंपनी शिस्तबद्ध अंडररायटिंग, ग्राहक-केंद्रित नाविन्यपूर्ण उपक्रम आणि विम्याची पोहोच वाढवणे यांवर लक्ष केंद्रित करणे सुरूच ठेवेल.

---------------

हिंदुस्थान समाचार / सुधांशू जोशी