नवी दिल्ली, 04 ऑगस्ट (हिं.स.)दोन वेळचा ऑलिम्पिक पदक विजेता नीरज चोप्रा २१ ऑगस्ट रोजी लॉझान डायमंड लीगमध्ये राष्ट्रकुल क्रीडा स्पर्धेतील विजेता आणि या हंगामातील सर्वोत्तम खेळाडू श्रीलंकेच्या रोमेश पाथिरागेचा सामना करेल. ग्लासगो राष्ट्रकुल क्रीडा स्पर्धेत सहभागी झालेले पाच खेळाडू या स्पर्धेत भाग घेणार आहेत.

ग्लासगोमध्ये ८५.८३ मीटरची या हंगामातील सर्वोत्तम कामगिरी करणाऱ्या नीरजचा सामना पाकिस्तानचा ऑलिम्पिक विजेता अर्शद नदीम, त्रिनिदाद आणि टोबॅगोचा विद्यमान विश्वविजेता केशॉर्न वॉलकॉट आणि ग्रेनेडाचा माजी विश्वविजेता अँडरसन पीटर्स यांच्याशी होईल. टोकियो ऑलिम्पिक रौप्य पदक विजेता झेक प्रजासत्ताकचा याकूब वालाश, जर्मनीचा ज्युलियन वेबर, स्वित्झर्लंडचा सायमन वायलांड आणि अमेरिकेचा कर्टिस थॉम्पसन हे देखील या स्पर्धेत सहभागी होणार आहेत.

आयोजकांनी सांगितले की, गेल्या चार ऑलिम्पिक आणि जागतिक चॅम्पियनशिप जिंकलेल्या खेळाडूंसह भालाफेकीतील पाच सुपरस्टार २१ ऑगस्ट रोजी होणाऱ्या या स्पर्धेत सहभागी होतील. दुखापतीतून सावरल्यानंतर नीरजची ही तिसरी स्पर्धा असेल. जूनमध्ये झालेल्या दोहा डायमंड लीगमध्ये त्याने ८५.६९ मीटर भालाफेक करून चौथे स्थान पटकावले होते. पाथिरागेने राष्ट्रकुल क्रीडा स्पर्धेत ८९.७५ मीटर भालाफेक करून प्रथम क्रमांक मिळवला होता.

जूनमध्ये झालेल्या गोल्डन गाला पिएत्रो मेनिया स्पर्धेत त्याने ९२.६२ मीटर भालाफेक केली होती. आशियाई खेळांपूर्वी, लॉझान डायमंड लीगमध्ये नीरजसमोर एक मोठे आव्हान असेल, कारण या स्पर्धेत अनुभवी भालाफेकपटू सहभागी होणार आहेत. ग्लासगोमध्ये नीरजने उत्कृष्ट कामगिरी करत रौप्य पदक जिंकले होते. पण तो या कामगिरीत सुधारणा करण्याचा प्रयत्न करेल.

---------------

हिंदुस्थान समाचार / वृषाली देशपांडे