लेह (लडाख), 07 ऑगस्ट (हिं.स.)। इंडियन आर्मी आइस हॉकी संघाने रोमांचक अंतिम सामन्यात लेह किंग्सचा 6-5 ने पराभव करत उद्घाटन रॉयल एनफिल्ड चॅलेंजर्स कपचे विजेतेपद पटकावले. नवान्ग दोरजे स्टोबदान (एनडीएस) स्टेडियममध्ये खेळल्या गेलेल्या या सामन्यात शेवटच्या क्षणापर्यंत चुरशीची लढत पाहायला मिळाली. रॉयल एनफिल्ड आइस हॉकी लीगमधून उदयास आलेल्या खेळाडूंनी सजलेल्या लेह किंग्सने देशातील सर्वात मजबूत आइस हॉकी संघाला कडवी झुंज दिली. सामन्याचा निर्णायक गोल पद्मा नामग्यालने अंतिम क्षणी फुंटसोग नामग्यालच्या पासवर करत इंडियन आर्मीला 6-5 असा विजय मिळवून दिला.

लेह किंग्सने सामन्याची सुरुवात शानदार केली. त्सेरिंग अंगचुकने मुश्ताक अहमद गिरीच्या पासवर पहिला गोल करत आपल्या संघाला आघाडी मिळवून दिली. मात्र इंडियन आर्मीने त्वरित प्रत्युत्तर देत दोरजे अंगचुक आणि जिगमत कुंजांग यांच्या गोलच्या जोरावर पहिला पीरियड 2-1 अशा आघाडीसह समाप्त केला. दुसऱ्या पीरियडच्या सुरुवातीला रिगजिन नोरबूने गोल करत आघाडी 3-1 अशी केली, मात्र लेह किंग्सने हार मानली नाही. स्टांजिन अंगचोकने सलग दोन गोल करत स्कोअर 3-3 असा बरोबरीत आणला. त्यानंतर रिगजिन नोरबूने इंडियन आर्मीला पुन्हा आघाडी मिळवून दिली, पण चंबा त्सेतनच्या गोलमुळे लेह किंग्सने स्कोअर 4-4 असा केला.

तिसऱ्या आणि अंतिम पीरियडच्या सुरुवातीला स्टांजिन अंगचोकने हॅट्रिक पूर्ण करत लेह किंग्सला 5-4 अशी आघाडी मिळवून दिली. दबावाच्या परिस्थितीत इंडियन आर्मीने आपल्या अनुभवाचे प्रदर्शन केले. जिगमत कुंजांगने स्कोअर बरोबरीत आणला आणि त्यानंतर पद्मा नामग्यालने विजयी गोल करत संघाला ऐतिहासिक विजेतेपद मिळवून दिले. स्पर्धेत शानदार कामगिरीसाठी इंडियन आर्मीच्या सोनम त्सेतनला सर्वोत्तम गोलरक्षक म्हणून निवडण्यात आले, तर लेह किंग्सच्या त्सेरिंग अंगचुकला स्पर्धेतील सर्वोत्तम खेळाडू घोषित करण्यात आले.

ही स्पर्धा रॉयल एनफिल्ड सोशल मिशन, लडाख आइस हॉकी संघ आणि लाहौल-स्पीती आइस हॉकी संघ यांच्या संयुक्त विद्यमाने आयोजित करण्यात आली होती. यामध्ये इंडियन आर्मी, आयटीबीपीची सेंट्रल आइस हॉकी टीम, लेह किंग्स, कारगिल वॉरियर्स आणि स्पीती टायटन्स अशा पाच संघांनी सहभाग घेतला. लीग टप्प्यानंतर अव्वल दोन संघांनी अंतिम सामन्यात प्रवेश केला.

इंडियन आर्मी आइस हॉकी संघाचा कर्णधार त्सेवांग नामग्याल म्हणाला, आम्हाला मोठ्या प्रेक्षक समूहासमोर खेळण्याची सवय आहे, मात्र लडाख आणि स्पीतीमधील युवा खेळाडूंसाठी हा अनुभव जीवन बदलणारा ठरू शकतो. पर्यटन हंगामात या स्पर्धेच्या आयोजनामुळे हजारो प्रेक्षकांनी प्रथमच आइस हॉकी पाहिली आणि स्थानिक खेळाडूंची प्रतिभा जवळून अनुभवली. यामुळे खेळाडूंना ओळख मिळाली आणि जगासमोर हिमालयात विकसित होत असलेल्या भारतीय आइस हॉकीचे नवीन चित्र समोर आले.

लेहमधील अत्याधुनिक ऑल-सीजन आइस रिंकवर आयोजित करण्यात आलेल्या सहा दिवसीय या स्पर्धेत 15 हजारांहून अधिक प्रेक्षकांनी सामन्यांचा आनंद घेतला. आयोजकांच्या मते, ही स्पर्धा हिमालयीन क्षेत्रात आइस हॉकीच्या विकासासाठी आणि युवा खेळाडूंना राष्ट्रीय स्तरापर्यंत पोहोचवण्याच्या दिशेने एक महत्त्वपूर्ण पाऊल ठरेल.

---------------

हिंदुस्थान समाचार / Suraj Chaugule