रायगड, 11 सप्टेंबर (हिं.स.)। काँग्रेस पक्षाच्या संघटनात्मक पुनर्बांधणीच्या पार्श्वभूमीवर उरण तालुका काँग्रेस कमिटीच्या उपाध्यक्षपदी आदित्य यशवंत घरत यांची नियुक्ती करण्यात आली आहे. पक्षाचे ज्येष्ठ नेते व कामगार नेते महेंद्र घरत यांचे विश्वासू सहकारी आणि काँग्रेसच्या तळागाळातील संघटनात्मक कामात सक्रिय असलेल्या आदित्य घरत यांच्यावर ही जबाबदारी सोपविण्यात आल्याने तालुक्यातील काँग्रेस कार्यकर्त्यांमध्ये उत्साहाचे वातावरण निर्माण झाले आहे.
महाराष्ट्र प्रदेश काँग्रेसचे प्रदेशाध्यक्ष हर्षवर्धन सपकाळ तसेच ज्येष्ठ नेते महेंद्र घरत यांच्या हस्ते आदित्य घरत यांना नियुक्तीपत्र प्रदान करण्यात आले. आगामी काळात उरण तालुक्यात काँग्रेसची संघटनात्मक ताकद वाढविणे, कार्यकर्त्यांना सक्रिय करणे आणि स्थानिक पातळीवरील जनतेच्या प्रश्नांवर पक्षाची भूमिका अधिक आक्रमकपणे मांडणे, अशी मोठी जबाबदारी त्यांच्यावर असणार आहे.
आदित्य घरत यांनी काँग्रेस पक्षाच्या विचारधारेचा प्रचार आणि प्रसार करताना सातत्याने पक्षाच्या विविध उपक्रमांमध्ये सहभाग घेतला आहे. संघटनबांधणीपासून जनसंपर्कापर्यंतच्या कामात सक्रिय राहिल्याने पक्षाच्या वरिष्ठ नेतृत्वाने त्यांच्यावर विश्वास व्यक्त केल्याचे मानले जात आहे. विशेषतः महेंद्र घरत यांच्या नेतृत्वाखालील पक्षाच्या स्थानिक राजकीय वाटचालीत त्यांची भूमिका महत्त्वाची राहिली आहे. नियुक्तीनंतर आदित्य घरत यांनी प्रदेशाध्यक्ष हर्षवर्धन सपकाळ, महेंद्र घरत तसेच वरिष्ठ पदाधिकाऱ्यांचे आभार मानले. “ही निवड केवळ पदाची जबाबदारी नसून पक्षाची विचारधारा, लोकशाही मूल्ये आणि सर्वसामान्यांच्या हक्कांसाठी अधिक जोमाने काम करण्याची संधी आहे,” असे त्यांनी सांगितले.
उरणमधील आगामी स्थानिक राजकारणाच्या पार्श्वभूमीवर ही नियुक्ती महत्त्वाची मानली जात आहे. तालुक्यातील विविध सामाजिक, कामगार आणि नागरी प्रश्नांवर काँग्रेसला अधिक प्रभावीपणे मैदानात उतरविण्याचे आव्हान नव्या पदाधिकाऱ्यांसमोर आहे. पक्षाच्या जुन्या कार्यकर्त्यांसोबत समन्वय साधत युवा वर्गाला संघटनेशी जोडण्यावरही भर दिला जाणार आहे. त्यामुळे आदित्य घरत यांच्या नियुक्तीकडे केवळ संघटनात्मक बदल म्हणून नव्हे, तर उरणमध्ये काँग्रेसची राजकीय पकड मजबूत करण्याच्या प्रयत्नातील महत्त्वाचे पाऊल म्हणून पाहिले जात आहे. असे पक्षातून सांगण्यात आले.
---------------
हिंदुस्थान समाचार / संदेश साळुंके (रायगड)
