रायगड, 11 सप्टेंबर (हिं.स.)। ‘भाजपमध्ये कॉन्ट्रॅक्टरना स्थान नाही’, असे स्पष्ट वक्तव्य पक्षाचे नेते रविंद्र चव्हाण यांनी दक्षिण रायगड भाजपच्या कार्यकारिणीच्या सभेत केल्याने जिल्ह्यातील भाजपच्या राजकीय वर्तुळात चर्चेला उधाण आले आहे. विशेष म्हणजे, हे वक्तव्य केल्यानंतर सभागृहातून झालेल्या टाळ्यांच्या प्रतिसादाकडेही चव्हाण यांनी लक्ष वेधल्याने त्यांच्या विधानाचा नेमका रोख कोणाकडे होता, याबाबत राजकीय तर्क-वितर्कांना सुरुवात झाली आहे.

दक्षिण रायगड भाजपच्या संघटनात्मक बैठकीत कार्यकर्ते व पदाधिकाऱ्यांना मार्गदर्शन करताना चव्हाण यांनी पक्षाची विचारधारा, संघटनात्मक शिस्त आणि कार्यकर्त्यांची भूमिका यावर भर दिला. राजकारण करताना वैयक्तिक आर्थिक हितसंबंध, ठेकेदारी किंवा व्यावसायिक संबंधांना पक्षाच्या संघटनात्मक भूमिकेपेक्षा प्राधान्य मिळता कामा नये, असा संदेश त्यांच्या वक्तव्यातून देण्यात आल्याचे मानले जात आहे.

‘कॉन्ट्रॅक्टरना भाजपमध्ये स्थान नाही’, हे सांगताना सभागृहातील टाळ्यांचा प्रतिसाद अपेक्षेइतका नसल्याचे चव्हाण यांच्या निदर्शनास आले. त्यावर त्यांनी सूचक भाष्य केल्याचे सांगितले जाते. त्यामुळे या प्रसंगालाही स्थानिक राजकीय वर्तुळात विशेष महत्त्व प्राप्त झाले आहे.

दक्षिण रायगडमध्ये भाजपची संघटनात्मक बांधणी मजबूत करण्याचे प्रयत्न सुरू असतानाच पक्षातील काही नेत्यांच्या राजकीय जवळिकीबाबत कार्यकर्त्यांमध्ये चर्चा होत असते. या पार्श्वभूमीवर चव्हाण यांच्या वक्तव्याने अनेकांच्या भुवया उंचावल्या आहेत. मात्र, त्यांनी कोणत्याही व्यक्तीचे नाव घेतले नसल्याने विधानाचा थेट रोख नेमका कोणाकडे आहे, हे स्पष्ट झालेले नाही.

दरम्यान, आगामी काळात दक्षिण रायगड भाजपमध्ये संघटनात्मक पातळीवर कोणते बदल होतात, याकडे कार्यकर्त्यांचे लक्ष लागले आहे. ‘कॉन्ट्रॅक्टरना स्थान नाही’ या विधानामागील राजकीय संदेश कोणता, याची चर्चा आता पक्षाच्या स्थानिक वर्तुळात रंगू लागली आहे.

---------------

हिंदुस्थान समाचार / संदेश साळुंके (रायगड)