नांदेड, 13 सप्टेंबर (हिं.स.)। श्री गुरुग्रंथ साहिबजी महाराज यांच्या पहिल्या प्रकाश पर्वानिमित्त मुख्यमंत्री सहाय्यता निधी व धर्मादाय रुग्णालय मदत कक्ष, जिल्हाधिकारी कार्यालय, नांदेड आणि गुरु रामदास सेवाभावी संस्था, नांदेड यांच्या संयुक्त विद्यमाने गुरुद्वारा गेट क्रमांक १ येथे महाआरोग्य तपासणी शिबिराचे आयोजन करण्यात आले. या शिबिरात एकूण १ हजार १५७ नागरिकांना विविध मोफत वैद्यकीय सेवांचा लाभ देण्यात आला.
शिबिरात मेडिसिन, शल्यचिकित्सा, अस्थिरोग, ईएनटी, स्त्रीरोग, बालरोग, दंतचिकित्सा, नेत्ररोग, त्वचारोग, आयुर्वेद व फिजिओथेरपी विभागातील तज्ज्ञ डॉक्टरांनी तपासणी करून उपचार व मार्गदर्शन केले. तसेच रक्तदानाची सुविधाही उपलब्ध करून देण्यात आली.
विभागनिहाय मेडिसिन २२०, शल्यचिकित्सा २५, अस्थिरोग ६१, ईएनटी ४४, स्त्रीरोग २२, बालरोग ११, दंतचिकित्सा १७१, नेत्ररोग २८०, त्वचारोग ७८, आयुर्वेद ११०, फिजिओथेरपी १२३ आणि रक्तदान १२ अशा सेवांचा नागरिकांनी लाभ घेतला. याशिवाय १२७ आयुष्मान भारत (ABHA) कार्ड, ८ ईसीजी आणि ३१५ रक्त तपासण्या करण्यात आल्या. पुढील उपचारांची आवश्यकता असलेल्या ४३ रुग्णांना उच्चस्तरीय रुग्णालयात संदर्भित करण्यात आले.
शिबिराच्या आयोजनात डॉ. शंकरराव चव्हाण शासकीय वैद्यकीय महाविद्यालय व रुग्णालय, शासकीय आयुर्वेद महाविद्यालय व रुग्णालय, श्री गुरु गोविंद सिंहजी स्मारक जिल्हा सामान्य रुग्णालय, नांदेड रुरल डेंटल कॉलेज, नांदेड फिजिओथेरपी कॉलेज अँड रिसर्च सेंटर, लॉयन्स हॉस्पिटल (जंगमवाडी), आरोग्य भारती नांदेड आणि धन्वंतरी सेवाभावी संस्था, लोहा यांनी सहभाग घेतला. मोफत व दर्जेदार आरोग्यसेवा नागरिकांपर्यंत पोहोचविणाऱ्या या उपक्रमाला नागरिकांचा उत्स्फूर्त प्रतिसाद मिळाला.
---------------
हिंदुस्थान समाचार / Sangita Hanumant Rao Chitanis
