ओटावा, 04 सप्टेंबर (हिं.स.)।कॅनडाचे पंतप्रधान मार्क कार्नी यांनी सांगितले की, ओटावा अमेरिकेसोबत असा टिकाऊ व्यापार करार करण्यास तयार आहे, ज्यामुळे दोन्ही देशांना फायदा होईल. त्याचबरोबर, अमेरिकेसोबत वाढत असलेल्या व्यापार तणावाच्या पार्श्वभूमीवर कॅनडा आपल्या कामगार, कुटुंबे आणि व्यवसायांच्या हितांचे संरक्षण करत राहील, असे त्यांनी स्पष्ट केले.

कॅनडाचे पंतप्रधान मार्क कार्नी म्हणाले की, कॅनडाला घाईघाईने केलेली राजकीय घोषणा नको आहे, तर दोन्ही देशांसाठी दीर्घकालीन आणि फायदेशीर ठरेल असा करार हवा आहे. मार्क कार्नी यांनी पत्रकार परिषदेत सांगितले, “आम्ही नेहमीच कॅनडा, कॅनडाचे कामगार आणि कॅनडातील कुटुंबांच्या सर्वोत्तम हितासाठी ठामपणे उभे राहू. आम्हाला कोणताही सोपा विजय किंवा केवळ घोषणा नको आहे, तर टिकाऊ स्वरूपाचा करार हवा आहे. असा करार शक्य आहे आणि त्यातून आपल्या दोन्ही देशांना फायदा होऊ शकतो.”

कॅनेडियन कामगार, कुटुंबे आणि व्यवसायांच्या हितांचे संरक्षण करणाऱ्या करारामुळे अमेरिकेतील ग्राहक, व्यवसाय आणि कुटुंबांनाही फायदा होईल, असे त्यांनी सांगितले. ते पुढे म्हणाले, “अमेरिका जेव्हा तयार असेल, तेव्हा आम्ही चर्चेसाठी बसून असा करार करण्यास तयार आहोत.”मात्र, मार्क कार्नी यांनी संकेत दिले की, ओटावा केवळ वॉशिंग्टनच्या पुढील निर्णयाची वाट पाहत बसणार नाही. कॅनडा आपली अर्थव्यवस्था अधिक मजबूत करण्यासाठी आणि इतर देशांसोबत व्यापारिक संबंध वाढवण्यासाठी प्रयत्न करत आहे.

ते म्हणाले, “योग्य वेळी आपण पाहू. चर्चा होईलच. मात्र, सध्या आपण करू शकणारी सर्वात महत्त्वाची गोष्ट म्हणजे फोनजवळ बसून एखाद्या कॉलची वाट पाहत राहणे किंवा सोशल मीडियावरील अपडेट्स पाहत राहणे नव्हे. आपल्याला देशाची उभारणी करायची आहे, ती अधिक मजबूतपणे करायची आहे, आत्ताच करायची आहे आणि पुढे जायचे आहे.”कार्नी पुढे म्हणाले, “जगभरातील ज्या देशांना कॅनडासोबत करार करायचा आहे, त्या सर्व देशांशी चर्चा करून व्यापार करार करायचे आहेत.”

---------------------

कॅनडाच्या पंतप्रधानांनी ओटावाची ही भूमिकाही पुन्हा स्पष्ट केली की, वॉशिंग्टनने प्रस्तावित केलेल्या अटी नाकारल्यानंतर अमेरिकेसोबतची व्यापार चर्चा थांबवण्याचा निर्णय कॅनडाला घ्यावा लागला.ते म्हणाले, “आपल्या देशाची परीक्षा घेतली जात आहे. दोन आठवड्यांपूर्वी आम्ही अमेरिकेसोबतची व्यापार चर्चा थांबवण्याचा योग्य निर्णय घेतला. अमेरिकेने दिलेली ऑफर आम्ही स्वीकारू शकत नव्हतो. त्यांनी ज्या गोष्टींची मागणी केली होती, त्या आम्ही देऊ शकत नव्हतो. परिणामी, अमेरिकेने नवीन शुल्क (टॅरिफ) लागू केले आहे. त्यांचा उद्देश आम्हाला नुकसान पोहोचवणे आणि आमच्यात फूट पाडणे हा आहे.”

चार दशकांनंतर प्रथमच व्हीआयए रेलच्या प्रवासी रेल्वेगाड्या कॅनडामध्ये तयार केल्या जाणार असल्याची घोषणा करताना कार्नी यांनी ही माहिती दिली. वॉशिंग्टन आणि ओटावा यांच्यातील व्यापार चर्चा ठप्प झाल्यानंतर अमेरिका-कॅनडा व्यापार संबंधांमध्ये मोठी घसरण झाल्याच्या पार्श्वभूमीवर हा घडामोडींचा क्रम समोर आला आहे.

---------------

हिंदुस्थान समाचार / Priyanka Bansode