अमरावती, 15 ऑक्टोबर (हिं.स.) | सार्वजनिक वितरण व्यवस्थेमधील धान्याची अवैध वाहतूक करणाऱ्यांविरोधात नाटगावपेठ पोलिसांनी मंगळवारी रात्री उशिरा हि मोठी कारवाई केली. पोलिसांनी पोर्टिफाईड तांदळाने भरलेला ट्रक पकडत तब्बल २१ लाख रुपये किमतीचा मुद्देमाल जप्त केला. या धाडसी कारवाईने धान्य तस्करी करणाऱ्या किट्समध्ये एकच खळबळ उडाली आहे.

मिळालेल्या माहितीनुसार, पोलीस निरीक्षक दिनेश दहातोंडे यांना एका ट्रकमधून पोर्टिफाईड तांदळाची अवैधरीत्या वाहतूक होत असल्याची माहिती मिळाली. त्यांनी तत्काळ जिल्हा पुरवठा अधिकारी,अमरावती ग्रामीण यांना कळवून संयुक्तरीत्या पाहणी केली.

पंचासमक्ष पंचनामा करून २४० किंटल पोर्टिफाईड तांदूळ किंमत सुमारे ६ लाख रुपये आणि ट्रक (एमएच ३० बीडी १५९९, किंमत सुमारे १५ लाख रुपये) असा एकूण २१ लाख रुपये किंमतीचा मुद्देमाल जप्त करण्यात आला. वाहनचालक शिवशंकर ओंकार तायडे (रा. अकोला) आणि हमाल राजेश सोनोने (रा. अकोला) यांनी चौकशीत हा तांदूळ अमोल महल्ले (रा. भातकुली) यांच्या गोदामातून घेऊन वडसा (जि. गडचिरोली) येथे नेत असल्याचे सांगितले.

त्यांच्याजवळ 'बालाजी ट्रेडर्स'चे बिल सापडले. प्राथमिक चौकशीत संबंधित तांदूळ सार्वजनिक वितरण व्यवस्थेतील असल्याचा संशय बळावल्यामुळे प्रकरणातील मुख्य सूत्रधार अमोल महल्ले, शिवशंकर तायडे आणि राजेश सोनोने यांच्याविरुद्ध जीवनावश्यक वस्तू अधिनियम १९५५ च्या कलम ३ व ७ अंतर्गत नांदगाव पेठ पोलिसांनी गुन्हा दाखल केला.ही. कारवाई पुरवठा विभाग व नांदगावपेठ पोलिस ठाण्याच्या पथकाने संयुक्तपणे वरिष्ठ पोलीस निरीक्षक दिनेश दहातोंडे यांच्या नेतृत्वात पार पडली. या मोहिमेत निरीक्षक. अधिकारी चैताली यादव, हवालदार राजाभाऊ राऊत, राजीक खान, निलेश साविकार, राजा सय्यद, वैभव तिखीले आणि अमित ढोले यांनी सहभाग घेतला.

---------------

हिंदुस्थान समाचार / अरुण जोशी