प्राप्ती रेडकरने फटाके फोडणं थांबवलं – निसर्गासाठी माझं छोटं पाऊल!

भाऊबीजेच्या दिवशी आम्ही नेहमी एकत्र येतो! – महिमा म्हात्रे

मुंबई, 18 ऑक्टोबर (हिं.स.)। सण म्हणजे आपलेपणाचा, प्रेमाचा आणि कुटुंबासोबत वेळ घालवण्याचा आनंददायी अनुभव. दिवाळी ही अशीच एक संधी आहे जी आपल्याला आप्तेष्ट, सखेसोबती आणि भावंडांबरोबर जुन्या आठवणी जागवण्याची संधी देते. कलाकार देखील त्यांच्या व्यस्त वेळापत्रकातून वेळ काढून कुटुंबासोबत दिवाळी साजरी करण्याची योजना करत आहेत. अभिनेत्री प्राप्ती रेडकर आणि महिमा म्हात्रे यांनी त्यांच्या दिवाळीच्या आठवणी आणि दिवाळी साजरी करण्याच्या खास पद्धती सांगितल्या.

‘सावळ्याची जणू सावली’ या मालिकेतील सावलीची भूमिका साकारणारी प्राप्ती रेडकर म्हणाली, जर सुट्टी मिळाली तर मी माझ्या आई- वडिलांबरोबर दिवाळी साजरी करेन. माझ्या लहानपणीची एक खास आठवण म्हणजे माझ्या नानीच्या घरी आम्हा लहान मुलांमध्ये दरवर्षी पहाटे ४ वाजता कोण पहिलं फटाका वाजवतो याची स्पर्धा असायची. आई-वडिलांनी आणलेले नवीन कपडे घालून मरीन लाइन्सला जाणं, हे फार जिव्हाळ्याचं आहे माझ्यासाठी. गेल्या ५ वर्षांपासून मी फटाके फोडणं थांबवलं आहे कारण वायूप्रदूषण खूप होतं. माझ्या छोट्याशा कृतीने निसर्ग वाचत असेल तर का नाही? मात्र दिवाळी साजरी करण्याचे विविध मार्ग आहेत. मी कुटुंबासोबत फराळ करणे, नातेवाईकांना भेटणे आणि फराळ बनवण्याच्या प्रक्रियेत सहभागी होणे हा माझ्यासाठी दिवाळीचा एक खास भाग आहे. प्राप्ती पुढे म्हणाली माझं व्यक्तिमत्व फुलबाजी आणि चकरी सारखं आहे. फुलबाजीसारखं 'तडतड' करत मी सेटवर एका ठिकाणाहून दुसऱ्या ठिकाणी सतत फिरत असते.

‘तुला जपणार आहे’ मालिकेतील मीराची भूमिका साकारणारी अभिनेत्री महिमा म्हात्रे म्हणाली, दिवाळी आम्ही खूप पारंपरिक पद्धतीने साजरी करतो. नरक चतुर्दशीला लवकर उठून उटणं लावणं, दिवे लावणं, कुटुंबासोबत फराळ करणं, देवदर्शन आणि नातेवाईकांना भेटणं हे सगळं एकत्रित करत दिवाळीची मजा वाढते. या वर्षी मी खूप उत्सुक आहे कुटुंबासोबत दिवाळी साजरी करण्यासाठी, कारण 'तुला जपणार आहे' च्या शूटमुळे कुटुंबाला भेटायला वेळ मिळत नाही. पण दिवाळीच्या दिवशी मी घरीच असणार आहे. दरवर्षी आम्हा भावंडांची एक परंपरा आहे की आम्ही भाऊबीजेच्या दिवशी कुठेही असलो तरी एकत्र येतो. माझा भाऊ ध्रुव माझ्या खूप जवळचा आहे. ध्रुव आणि माझी तन्वी ताई दोघांनीही मला खूप साथ दिली आहे, मार्गदर्शन, कौतुक केलं आहे आणि मला माझ्या क्षेत्रात पुढे जाण्यास मदत केली. दिवाळी म्हणजे एकत्र येण्याचा आणि आपुलकीच्या बंधांनी नाती घट्ट करण्याचा सण आहे. कलाकारांच्या या आठवणी आपल्या साऱ्यांनाही आपल्या बालपणात घेऊन जातात. नात्यांची ही दिवाळी अशीच प्रेमाने उजळत राहो.

तेव्हा बघायला विसरू नका सावळ्याची जणू सावली संध्या ७:०० वा. आणि 'तुला जपणार आहे' रात्री १०:३० वा. सदैव तुमच्या झी मराठीवर.

---------------

हिंदुस्थान समाचार / हर्षदा गावकर