चंडीगड, १८ ऑक्टोबर (हिं.स.) - पंजाबमधील फतेहगड साहिब जिल्ह्यातील सरहिंद रेल्वे स्थानकाजवळ आज सकाळी गरीब रथ ट्रेनच्या एका बोगीला आग लागली. गरीब रथ ट्रेन अमृतसरहून बिहारमधील सहरसा येथे जात होती. बोगी क्रमांक १९ मध्ये आग लागली. कोणतीही जीवितहानी झालेली नाही.
प्राथमिक तपासात शॉर्ट सर्किटमुळे आग लागल्याचे दिसून येत आहे. आगीची माहिती मिळताच, आपत्कालीन ब्रेक वापरून ट्रेन थांबवण्यात आली. ट्रेन थांबताच प्रवाशांमध्ये चेंगराचेंगरी झाली आणि एकमेकांच्या आधी उतरण्याचा प्रयत्न करणाऱ्या अनेक प्रवाशांना दुखापत झाली. सुमारे एक तासानंतर आग आटोक्यात आणण्यात आली.
अधिकाऱ्यांनी सांगितले की, ट्रेन सकाळी ७ वाजता सरहिंद स्टेशनवरून गेली. ब्राह्मण माजरा गावाजवळ, एका प्रवाशाला बोगी क्रमांक १९ मधून धूर येत असल्याचे दिसले. त्याने ओरडून साखळी ओढली. धुरासोबत ज्वाळाही उठू लागल्या, ज्यामुळे घबराट पसरली. माहिती मिळताच रेल्वे, अग्निशमन दल आणि पोलिस पथके घटनास्थळी पोहोचली. त्याआधी, गोंधळाच्या वातावरणात, प्रवासी डब्यातून उतरू लागले. इतर डब्यांमधील प्रवासीही उतरले. टीटीई आणि पायलटने रेल्वे नियंत्रण कक्षाला याची माहिती दिली.
रेल्वेने एका निवेदनात म्हटले आहे की, आज सकाळी ७:३० वाजता पंजाबमधील सरहिंद स्टेशनवर अमृतसर-सहरसा क्रमांकाच्या १२२०४ ट्रेनच्या एका डब्याला आग लागली. घटनेची माहिती मिळताच रेल्वे अधिकाऱ्यांनी तातडीने कारवाई करत प्रवाशांना इतर डब्यांमध्ये हलवले आणि आगही लवकर विझवण्यात आली. ट्रेन लवकरच रवाना होईल. यात कोणतीही जीवितहानी झाली नाही.
---------------
हिंदुस्थान समाचार / वृषाली देशपांडे
