नवी दिल्‍ली, 28 ऑक्टोबर (हिं.स.)। युवा व्यवहार आणि क्रीडा मंत्रालयाने वर्ष 2025 साठी मेजर ध्यानचंद खेलरत्न पुरस्कार, अर्जुन पुरस्कार, अर्जुन पुरस्कार (जीवनगौरव), द्रोणाचार्य पुरस्कार, राष्ट्रीय खेल प्रोत्साहन पुरस्कार या राष्ट्रीय क्रीडा पुरस्कारांसाठी 29 सप्टेंबर 2025 रोजी अर्ज मागवले होते. आता, अर्ज स्वीकारण्याची अंतिम तारीख 28 ऑक्टोबर 2025 वरून 4 नोव्हेंबर 2025 (मंगळवार) पर्यंत वाढविण्यात आली आहे. मंत्रालयाच्या www.yas.nic.in संकेतस्थळावर सूचना अपलोड करण्यात आल्या.

पुरस्कारासाठी पात्र खेळाडू/प्रशिक्षक/संस्थांकडून अर्ज मागविण्यात येत आहेत. त्यांनी समर्पित पोर्टल dbtyas-sports.gov.in वर स्वतः ऑनलाइन अर्ज करणे आवश्यक आहे. भारतीय ऑलिंपिक संघटना/भारतीय क्रीडा प्राधिकरण/मान्यताप्राप्त राष्ट्रीय क्रीडा महासंघ/क्रीडा प्रोत्साहन मंडळे/राज्य आणि केंद्रशासित प्रदेश सरकारे इत्यादींना देखील त्यानुसार कळविण्यात आले आहे. सर्व सरकारी कर्मचाऱ्यांसाठी दक्षता मंजुरी सादर करणे अनिवार्य आहे. 4 नोव्हेंबर 2025 (मंगळवार) नंतर प्राप्त झालेल्या अर्जांचा विचार केला जाणार नाही.

---------------

हिंदुस्थान समाचार / Suraj Chaugule