नवी दिल्ली, 28 ऑक्टोबर (हिं.स.)प्रदूषणाच्या पार्श्वभूमीवर दिल्लीबाहेर नोंदणीकृत हलकी व्यावसायिक वाहने (LGV), मध्यम वस्तू वाहने (MGV) आणि अवजड वस्तू वाहने (HGV) यासह सर्व BS-VI नसलेल्या व्यावसायिक वस्तू वाहनांना १ नोव्हेंबरपासून दिल्लीत प्रवेश करण्यास मनाई असेल.
वाहतूक विभाग हवा गुणवत्ता व्यवस्थापन आयोगाच्या (CAQM) या आदेशाची काटेकोरपणे अंमलबजावणी करण्याची तयारी करत आहे. अशा गैर-BS-VI वस्तू वाहनांना रोखण्यासाठी वाहतूक विभागाने ४८ पथके तयार केली आहेत. याव्यतिरिक्त, वाहतूक विभागाने एक नोटीस जारी करून या बंदी घातलेल्या वाहनांच्या मालकांना १ नोव्हेंबरपासून दिल्लीत प्रवेश करू नये असा इशारा दिला आहे.
वाहतूक विभागाने स्पष्ट केले आहे की, सर्व BS-VI व्यावसायिक वस्तू वाहनांना ३१ ऑक्टोबर २०२६ पर्यंत दिल्लीत प्रवेश करण्याची परवानगी आहे आणि त्यांच्यावर बंदी नाही. तथापि, त्यानंतर त्यांच्यावरही बंदी घातली जाईल. त्यानंतर, दिल्लीत फक्त इलेक्ट्रिक वाहनांना परवानगी असेल.
वाहतूक विभागाने असेही स्पष्ट केले आहे की व्यावसायिक वस्तू वाहनांवरील GRAP निर्बंधांचे विविध टप्पे विशिष्ट टप्प्याच्या कालावधीसाठी लागू राहतील.
वाहतूक विभाग आणि वाहतूक पोलीस दिल्लीच्या शेजारील राज्यांच्या सीमेवरील सर्व १२६ सीमा प्रवेश बिंदूंवर स्वयंचलित नंबर प्लेट ओळख कॅमेरे देखील स्थापित करतील. CAQM च्या आदेशानंतर, या अंमलबजावणी संस्था तिमाही अनुपालन अहवाल देखील सादर करणार आहेत.
---------------
हिंदुस्थान समाचार / वृषाली देशपांडे
