सॅक्रामेंटो, 8 ऑक्टोबर (हिं.स.)।भारतीय प्रवाशांसाठी कॅलिफोर्निया राज्याने दिवाळीला अधिकृत राजकीय सुट्टी जाहीर केली आहे. यामुळे कॅलिफोर्निया अमेरिकेतील तिसरे राज्य बनले आहे, ज्याने भारताच्या दिवाळी उत्सवाला अधिकृत सुट्टीचा दर्जा दिला आहे. कॅलिफोर्नियाचे गव्हर्नर गेव्हिन न्यूसम यांनी सांगितले की, त्यांनी विधानसभा सदस्य ऐश कालरा यांच्या पुढाकाराने मांडण्यात आलेल्या आणि दिवाळीला राजकीय सुट्टी जाहीर करणाऱ्या विधेयकावर स्वाक्षरी केली आहे. ‘एबी 268’ नावाचे हे विधेयक सप्टेंबर महिन्यात कॅलिफोर्निया विधिमंडळाच्या दोन्ही सभागृहांतून यशस्वीरित्या संमत झाले होते, आणि त्यानंतर गव्हर्नर न्यूसम यांच्या अंतिम निर्णयाची वाट पाहिली जात होती. कालरा यांनी गेल्या महिन्यात सांगितले होते, “कॅलिफोर्निया हा भारतीय अमेरिकन लोकसंख्येचा सर्वात मोठा भाग आहे, आणि दिवाळीला राजकीय सुट्टी म्हणून मान्यता देण्यामुळे लाखो कॅलिफोर्नियावासीयांपर्यंत हा संदेश पोहोचेल. हे आपल्या राज्यातील विविधतेचा स्वीकार करण्यास प्रोत्साहन देईल.” ते पुढे म्हणाले, “दिवाळी ही सद्भावना, शांतता आणि नवसृजन या सामूहिक भावनेचा संदेश देते आणि समुदायांना एकत्र आणते. कॅलिफोर्नियाने दिवाळी आणि तिच्या विविधतेचा स्वीकार करायला हवा – ती अंधारात लपवून ठेवू नये.” कॅलिफोर्नियात दिवाळीच्या अधिकृत सुट्टीच्या घोषणेचे सामुदायिक नेते आणि भारतीय प्रवासी संघटनांनी स्वागत केले आहे. ‘इंडियास्पोरा’ संस्थेने म्हटले की, ही मान्यता केवळ दिवाळीच्या उत्साहाचे प्रतीक नाही, तर संपूर्ण अमेरिका भर भारतीय अमेरिकन समुदायाने दिलेल्या स्थायी योगदानाचेही प्रतीक आहे. इंडियास्पोराचे संस्थापक आणि अध्यक्ष एम. आर. रंगास्वामी यांनी एका निवेदनात सांगितले, “हा ऐतिहासिक निर्णय त्या अनेक पिढ्यांचा सन्मान करतो, ज्यांनी कॅलिफोर्नियाच्या प्रगती आणि यशात मोलाचा वाटा उचलला आहे.” याआधी ऑक्टोबर २०२४ मध्ये, पेनसिल्व्हेनिया हे दिवाळीला अधिकृत राजकीय सुट्टी मान्यता देणारे पहिले राज्य बनले. त्यानंतर यावर्षी कनेक्टिकट राज्याने देखील दिवाळीला राजकीय सुट्टी घोषित केली.न्यूयॉर्क सिटीमध्ये दिवाळीनिमित्त शासकीय शाळांना सुट्टी दिली जाते.

---------------

हिंदुस्थान समाचार / Priyanka Bansode