स्वच्छ, सुंदर गोदावरी हाच शासनाचा ध्यास,कुंभमेळा मंत्री महाजन

नाशिक, 15 डिसेंबर (हिं.स.)।

नाशिकचा सिंहस्थ कुंभमेळा हा हरित कुंभमेळा म्हणून नियोजन करण्यात येत आहे. त्या अंतर्गत नाशिकमध्ये वृक्ष लागवड व संवर्धनाचा विक्रम होणारा असून देशात व राज्यात नावलौकिक झाल्याशिवाय राहणार नाही असे प्रतिपादन राज्याचे जलसंपदा व कुंभमेळा मंत्री श्री गिरीश महाजन यांनी केले आहे.

नाशिक शहरात 15 हजार वृक्षांची लागवड करून त्यांचे संवर्धन करण्यात येणार आहे. त्या अंतर्गत आपले नाशिक हरित नाशिक या मोहिमेचा शुभारंभ मंत्री महाजन यांच्या हस्ते व साधू,संत, महंत यांच्या उपस्थितीमध्ये करण्यात आला त्याप्रसंगी श्री मंत्री महाजन बोलत होते.

नाशिकचा कुंभमेळा होत असताना गोदावरी नदी स्वच्छ व सुंदर करण्यासाठी राज्याचे मुख्यमंत्री श्री देवेंद्र फडणवीस यांनी त्या संदर्भात नियोजन केले आहे. विकास कामे होताना अतिक्रमित बाधित लोकांना, विस्थापितांची जबाबदारी शासनाने घेतली आहे सर्वांना आधार दिला जाईल सरकार यासाठी सकारात्मक असल्याचे मंत्री महाजन यांनी सांगितले.

याबरोबरच ज्या ज्या ठिकाणी वृक्षारोपण केले जाईल त्यांचे संवर्धन करण्यात येईल. त्यासाठी नाशिककरांनी आपले योगदान देणे गरजेचे आहे व सर्वांचे येथे जबाबदारी आहे, असेही कुंभमेळा मंत्री गिरीश महाजन यांनी सांगितले.

हरित नाशिक उपक्रमांतर्गत आज सकाळी मखमलाबाद रस्त्यावरील भोईर मळ्यात नाशिक महानगरपालिकेतर्फे विविध स्वयंसेवी संस्थांच्या सहकार्याने वृक्षारोपणाचा कार्यक्रम आयोजित करण्यात आला होता. यावेळी आमदार राहुल ढिकले, आमदार देवयानी फरांदे, नाशिक त्र्यंबकेश्वर कुंभमेळा विकास प्राधिकरणाचे अध्यक्ष तथा विभागीय आयुक्त डॉ. प्रवीण गेडाम, कुंभमेळा आयुक्त शेखर सिंह, महानगरपालिका आयुक्त मनीषा खत्री, जिल्हाधिकारी आयुष प्रसाद, महानगरपालिकेच्या अतिरिक्त आयुक्त करिश्मा नायर, उपवनसंरक्षक सिद्धेश सावर्डेकर यांच्यासह महंत हरिगिरीजी महाराज, महंत भक्तिचरणदास महाराज, शंकरानंद महाराज, जनार्दन हरी महाराज, स्वामी भागवतानंद यांच्यासह प्रमुख आखाड्यांचे साधु,संत, महंत आदी उपस्थित होते.

कुंभमेळा ही आपली, संस्कृती, अस्मिता आहे. नाशिक शहराला आगळे वेगळे महात्म्य लाभले आहे. आध्यात्मिक वारसा लाभलेल्या या धार्मिक नगरीत तपोवनात साधू, महंतांच्या निवासाची व्यवस्था करण्यात येणार आहे. त्यासाठी आवश्यक तेवढेच वृक्ष काढण्यात येणार आहेत. या वृक्षांचे पुनर्रोपण करण्यात येईल. तसेच आई वडिलांच्या नावाने एका रोपाची लागवड करून त्यांचे संवर्धन करावे. त्यासाठी नाशिककरांनी पुढे आले पाहिजे. एवढेच नव्हे तर ठिकठिकाणी वृक्षारोपण करण्याचा कार्यक्रम हाती घेण्यात येईल. त्यासाठी सामाजिक दायित्व निधीची मदत घेण्यात येईल, असेही मंत्री श्री. महाजन यांनी सांगितले.

यावेळी अखिल भारतीय संत संमेलनाचे राष्ट्रीय महामंत्री, जितेंद्रानंदजी महाराज,

श्री हरिगिरीजी महाराज, स्वामी भागवतानंद, स्वामी शंकरानंद, जनार्दन हरी महाराज, शेखर गायकवाड यांनी मनोगत व्यक्त करीत वृक्षारोपण कार्यक्रमाचे स्वागत केले. याप्रसंगी १३ आखाड्यांचे प्रमुख, महामंडलेश्वर, महंत, स्वामी समर्थ सेवा केंद्र, जगद्गुरु नरेंद्राचार्य महाराज संस्थान, अण्णासाहेब धर्माधिकारी प्रतिष्ठान, आर्ट ऑफ लिव्हिंग, इस्कॉन, स्वामीनारायण संस्था आणि असंख्य सामाजिक संस्था उपस्थित होते तसेच नाशिक मधील अनेक नामवंत सामाजिक संस्था संघटना यामध्ये क्रेडाई, आईमा, निमा , नरेडको, पर्यावरण गतिविधि, सायकलिस्ट असोसिएशन संघटनांचे पदाधिकारी, मुक्त विद्यापीठ, गोदावरी सेवा समिती अश्या असंख्य सामाजिक संस्थांचे पदाधिकारी यांच्यासह नाशिक महानगरपालिकेचे अधिकारी व कर्मचारी, नागरिक, मोठ्या संख्येने उपस्थित होते.

रस्ता विकास कामाचे भूमिपूजन

सिंहस्थ कुंभमेळा अंतर्गत खडकाळी सिग्नल ते आयटीआय पर्यंतच्या रस्ता विकसित करण्याच्या कामाचे मंत्री श्री. महाजन यांच्या हस्ते भूमिपूजन करण्यात आले. यावेळी आमदार राहुल ढिकले, कुंभमेळा आयुक्त शेखर सिंह, महानगरपालिका आयुक्त मनीषा खत्री, जिल्हाधिकारी आयुष प्रसाद, शहर अभियंता संजय अग्रवाल आदी उपस्थित होते.त्यानंतर आमदार देवयानी फरांदे यांच्या विशेष निधीतून मुंबई नाका ते नेल्सन इस्पितळापर्यंतच्या रस्ता काँक्रीटीकरण आणि संरक्षक भिंत बांधण्याच्या कामाचे भूमिपूजन मंत्री श्री. महाजन यांच्या हस्ते झाले. यावेळी आमदार श्रीमती फरांदे, आमदार श्री. ढिकले आदी उपस्थित होते.

---------------

हिंदुस्थान समाचार / GOSAVI CHANDRASHEKHAR SUKDEV