श्रीनगर, 18 डिसेंबर (हिं.स.)।राष्ट्रीय तपास संस्था (एनआयए) ने गेल्या महिन्यात दिल्लीतील ऐतिहासिक लाल किल्ल्याच्या परिसरात झालेल्या बॉम्बस्फोट प्रकरणात आणखी एका प्रमुख आरोपीला अटक केली आहे. या प्रकरणात अटक करण्यात आलेला नववा आरोपी यासिर अहमद डार असून तो जम्मू–काश्मीरमधील श्रीनगर जिल्ह्यातील शोपियांचा रहिवासी आहे. या बॉम्बस्फोटात ११ जणांचा मृत्यू झाला होता, तर अनेक जण जखमी झाले होते.
एनआयएने जारी केलेल्या निवेदनानुसार, आरोपीला प्रकरण क्रमांक RC-21/2025/NIA/DLI अंतर्गत अनलॉफुल अॅक्टिव्हिटीज (प्रिव्हेन्शन) ॲक्ट, १९६७ तसेच बीएनएस २०२३ मधील संबंधित कलमान्वये अटक करण्यात आली आहे. एनआयएच्या तपासात असे उघड झाले आहे की १० नोव्हेंबर रोजी राजधानीत झालेल्या कार बॉम्बस्फोटाच्या कटात यासिरची सक्रिय भूमिका होती.
कटात सक्रिय सहभागी म्हणून त्याने निष्ठेची शपथ घेतली होती आणि फिदायीन हल्ल्यासाठी स्वतःला बांधील ठेवण्याचे वचन दिले होते. दहशतवादविरोधी संस्थेच्या तपासातून हेही समोर आले आहे की यासिर या प्रकरणातील इतर आरोपींसोबत, ज्यामध्ये उमर उन नबी (बॉम्बस्फोटात मृत झालेला आरोपी) आणि मुफ्ती इरफान यांचा समावेश आहे, सतत संपर्कात होता.
एनआयए विविध केंद्रीय आणि राज्य यंत्रणांच्या समन्वयाने या दहशतवादी हल्ल्यामागील संपूर्ण कट उघडकीस आणण्यासाठी सातत्याने आणि सतर्कतेने काम करत आहे. या महिन्याच्या सुरुवातीला एनआयएने जम्मू–काश्मीर आणि उत्तर प्रदेशातील अनेक आरोपी व संशयितांच्या ठिकाणी व्यापक झडती मोहीम राबवली होती. या कारवाईदरम्यान विविध डिजिटल उपकरणे आणि इतर आक्षेपार्ह साहित्य जप्त करण्यात आले.
यापूर्वी फरीदाबाद (हरियाणा) येथील अल-फलाह विद्यापीठाच्या परिसरात तसेच इतर ठिकाणी मुख्य आरोपी डॉ. मुजम्मिल शकील गनी आणि डॉ. शाहीन सईद यांच्या ठिकाणांवरही अशाच प्रकारची झडती घेण्यात आली होती.
---------------
हिंदुस्थान समाचार / Priyanka Bansode
