अर्चना देशमुख २,३७६ मतांनी विजयी

नागपूर , 21 डिसेंबर (हिं.स.) । नागपूर जिल्ह्यातील स्थानिक स्वराज्य संस्थांच्या निवडणुकांमध्ये काटोल नगरपालिकेच्या निकालाकडे विशेष लक्ष लागले होते. अखेर काटोल नगरपालिकेत राष्ट्रवादी काँग्रेस पार्टी (शरदचंद्र पवार गट) आणि शेतकरी कामगार पक्षाच्या अधिकृत उमेदवार अर्चना राहुल देशमुख यांनी २,३७६ मतांच्या फरकाने दणदणीत विजय मिळवत सत्तांतर घडवून आणले आहे. या निकालामुळे भाजपला मोठा राजकीय धक्का बसला असून भाजपचे आमदार चरणसिंग ठाकूर यांच्यासाठी हा पराभव प्रतिष्ठेचा मानला जात आहे.

अध्यक्षपदावर निर्णायक विजय

काटोल नगरपालिकेच्या एकूण प्रभागांचे निकाल जाहीर झाले असून, नगरपरिषदेतील संख्याबळात भाजप आणि विरोधी आघाडीत चुरशीची लढत झाली. मात्र नगराध्यक्षपदाच्या थेट निवडणुकीत अर्चना देशमुख यांनी निर्णायक आघाडी घेत भाजपच्या उमेदवाराचा पराभव केला.

मतमोजणीपासूनच आघाडी

मतमोजणीच्या पहिल्याच फेरीपासून अर्चना देशमुख यांनी आघाडी घेतली होती. प्रत्येक फेरीत त्यांची आघाडी वाढत गेली. पाच फेऱ्यांअखेर त्यांची आघाडी १,६३६ मतांवर पोहोचली होती, ज्यामुळे विजयाचे संकेत स्पष्ट झाले होते. अखेरीस सर्व फेऱ्यांनंतर त्यांनी २,३७६ मतांनी विजय निश्चित केला.

भाजपच्या बालेकिल्ल्याला हादरा

काटोल हा भाजपचा बालेकिल्ला मानला जात होता. त्यामुळे भाजपने या निवडणुकीत मोठी ताकद पणाला लावली होती. मात्र स्थानिक प्रश्न, विकासकामांबाबत असलेली नाराजी, महागाई आणि शेतकरी प्रश्न यांचा फटका भाजपला बसल्याचे राजकीय विश्लेषकांचे मत आहे.

प्रचारातील मुद्द्यांचा फायदा

अर्चना देशमुख यांनी प्रचारादरम्यान सर्वसामान्य नागरिकांचे प्रश्न, महिला सक्षमीकरण आणि नगरपालिकेच्या सर्वांगीण विकासावर भर दिला होता. याच मुद्द्यांमुळे मतदारांचा विश्वास संपादन करण्यात त्यांना यश आल्याचे दिसून येते.

राजकीय समीकरणांवर परिणाम

या निकालामुळे नागपूर जिल्ह्यातील राजकीय समीकरणांमध्ये महत्त्वाचा बदल होण्याची शक्यता वर्तवली जात आहे. राष्ट्रवादी काँग्रेस पार्टी (शरदचंद्र पवार गट) आणि शेतकरी कामगार पक्षाचे मनोबल वाढले असून आगामी निवडणुकांच्या दृष्टीने हा विजय महत्त्वाचा मानला जात आहे. दुसरीकडे भाजपच्या गोटात मात्र या पराभवामुळे चिंतेचे वातावरण आहे.--------------------------

हिंदुस्थान समाचार / मनीष कुलकर्णी