अकोला, 25 डिसेंबर (हिं.स.)। रब्बी हंगाम ई पीक पाहणीची सुरुवात झाली आहे. जिल्ह्यातील सर्व शेतकरी बांधवांनी 24 जानेवारी 2026पूर्वी आपल्या पिकांची नोंदणी करून घेण्यात यावी, असे आवाहन जिल्हाधिकारी वर्षा निमा यांनी केले आहे.

त्यासाठी 7/12 वर पीक पेरा स्वतः शेतकरी यांनी अँड्रॉइड फोनव्दारे नोंदणी करायचा आहे. शेतकरी स्तरावर पिक पाहणी करण्यासाठीचा शेवटची तारीख 24 जानेवारी आहे.

*आतापर्यंत अत्यल्प नोंदणी*

रब्बी हंगाम 2025 ई पिक पाहणी डिजिटल क्रॉप सर्वे अंतर्गत एकूण 3 लक्ष 81 हजार 714 पिक पाहणी करावयाच्या क्षेत्रापैकी पिक पाहणीत 3.34 टक्के इतकीच नोंदणी झाली आहे. अकोला जिल्ह्यात डिजिटल क्रॉप सर्वे अंतर्गत ई पीक पाहणीची नोंदणी 15 हजार 776.43 क्षेत्रावर झालेली आहे. उर्वरीत क्षेत्रावर सर्व शेतकरी बांधवांना ई पीक पाहणी अॅपव्दारे पीकांची नोंदणी करण्याचे आवाहन करण्यात आले आहे.

पीक पाहणीची नोंदणी ई पीक पाहणी व्हर्जन 4.0.5 या मोबाईल अॅपव्दारे करतांना अँड्रॉइड फोन आवश्यक आहे. सदर अॅप गुगल क्रोम अपडेट करून मोबाईल मध्ये इन्स्टॉल करून घ्यावे. ई पीक पाहणी अॅप व्दारे शेत बांधावर जावुन पिकांची नोंदणी करून माहिती अपलोड करावी. सदर कामी संबंधीत शेतक-याजवळ मोबाईल उपलब्ध नसल्यास अथवा हाताळता येत नसल्यास, संबंधीत गावाचे ग्राम महसूल अधिकारी, कोतवाल तसेच संबंधीत गावात नियुक्त केलेले सहायक यांची मदत घेऊन आपल्या पीकांची नोंदणी ई पिक पाहणी अॅप व्दारे करून घेण्यात यावी. सदर अॅप विषयी काही अडचण असल्यास संबंधीत गावाचे ग्राम महसूल अधिकारी तसेच कॉमन सर्व्हिस सेंटर, आपल्या गावातील DCS करिता नियुक्त सहाय्यक यांची मदत घ्यावी.

ई पीक पाहणी व्दारे पीकांची नोंदणी न केल्यास आपल्या 7/12 वर पीक पेरा कोरा राहील जो नंतर भरता येत नाही. त्यामुळे पीक विमा, व इतर शासकीय अनुदान व लाभ मिळविण्यास अडचण निर्माण होईल. अवेळी पाऊस किंवा इतर नैसर्गीक आपत्ती या बाबत पिक विमा मिळण्यासाठी 7/12 वर अचूक पीक नोंद असणे आवश्यक आहे. त्याअनुषंगाने सर्व शेतकरी बांधवांनी 24 जानेवारी 2026 पुर्वी आपल्या पिकांची नोंदणी करून घेण्यात यावी, असे आवाहन करण्यात आले आहे.

---------------

हिंदुस्थान समाचार / जयेश गावंडे