चंद्रपूर, 25 डिसेंबर (हिं.स.)।

राज्य निवडणूक आयोगाने चंद्रपूर महानगरपालिका सार्वत्रिक निवडणूक २०२५ चा कार्यक्रम जाहीर केला असून, त्या अनुषंगाने मतदान प्रक्रियेसाठी वापरण्यात येणारी इलेक्ट्रॉनिक मतदान यंत्रे (EVM) निश्चित केलेल्या मतदान केंद्रांवरील मतदानासाठी सुरक्षा कक्ष (गोदाम) येथे जमा करण्यात येणार आहेत.

निश्चित केलेल्या मतदान केंद्रावरील मतदानासाठी वापरण्यात येणारी EVM मशीन महानगरपालिका झोन क्रमांक ३, बंगाली कॅम्प, चंद्रपूर येथे असलेल्या ईव्हीएम मशीन सुरक्षा कक्ष (गोदाम) येथे जमा करण्यात येणार असून, ही प्रक्रिया दिनांक २६ डिसेंबर २०२५ रोजी दुपारी ३ वाजता पार पाडण्यात येणार आहे.

सदर प्रक्रिया निवडणूक आयोगाच्या मार्गदर्शक सूचनांनुसार पारदर्शकपणे राबविण्यात येणार असून, यावेळी सर्व मान्यताप्राप्त राजकीय पक्षांचे प्रतिनिधी व इच्छुक उमेदवार यांनी स्वतः किंवा आपल्या अधिकृत प्रतिनिधीमार्फत उपस्थित राहणे आवश्यक आहे. निवडणूक प्रक्रियेतील पारदर्शकता व विश्वासार्हता कायम राखण्यासाठी सदर उपस्थिती महत्त्वाची असल्याचे चंद्रपूर महानगरपालिका निवडणूक प्रशासनाच्या वतीने कळविण्यात आले आहे.

---------------

हिंदुस्थान समाचार / एम.पंकजराव