बीजिंग , 25 डिसेंबर (हिं.स.)।अमेरिकेच्या संरक्षण विभागाच्या (डिफेन्स डिपार्टमेंट) अलीकडेच जाहीर झालेल्या वार्षिक अहवालात चीन-भारत संबंधांचा उल्लेख करण्यात आल्यामुळे चीनच्या परराष्ट्र मंत्रालयाने नाराजी व्यक्त केली आहे. या अहवालात असे नमूद करण्यात आले आहे की, प्रत्यक्ष नियंत्रण रेषेवर (एलएसी) तणाव कमी झाल्याचा फायदा घेऊन चीन भारतासोबतचे द्विपक्षीय संबंध स्थिर करण्याचा प्रयत्न करू शकतो. या विधानावर चीनने तीव्र आक्षेप घेतला आहे.

चीनच्या परराष्ट्र मंत्रालयाने अमेरिकेवर आरोप केला आहे की, चीन-भारत संबंधांमध्ये सुधारणा होऊ नये यासाठी अमेरिका आपल्या संरक्षण धोरणाचे चुकीच्या पद्धतीने सादरीकरण करत आहे. यासंदर्भात चीनच्या परराष्ट्र मंत्रालयाचे प्रवक्ते लिन जियान पत्रकार परिषदेत एका प्रश्नाला उत्तर देत होते. त्यांना विचारण्यात आले होते की, वादग्रस्त सीमावर्ती भागांतील अलीकडील तणाव कमी झाल्याचा फायदा घेऊन चीन अमेरिका-भारत संबंध अधिक दृढ होण्यापासून रोखू शकतो का. या प्रश्नाला उत्तर देताना प्रवक्ते लिन जियान यांनी सांगितले की, चीन भारतासोबतच्या संबंधांकडे दीर्घकालीन आणि धोरणात्मक दृष्टिकोनातून पाहतो. त्यांनी पुढे स्पष्ट केले की सीमावर्ती प्रश्न हा चीन आणि भारत यांच्यातील द्विपक्षीय विषय आहे. या मुद्द्यावर कोणत्याही तिसऱ्या देशाने निर्णय देण्यास चीनचा ठाम विरोध आहे, असेही त्यांनी अमेरिकेला स्पष्टपणे सांगितले.

उल्लेखनीय बाब म्हणजे, मंगळवारी पेंटागनने आपल्या एका अहवालात म्हटले होते की, तणाव कमी झाल्याचा फायदा घेऊन चीन द्विपक्षीय संबंध स्थिर करण्याचा प्रयत्न करू शकतो, तसेच अमेरिका-भारत संबंध अधिक मजबूत होऊ नयेत यासाठीही प्रयत्न करू शकतो.

---------------

हिंदुस्थान समाचार / Priyanka Bansode