येवला, 3 डिसेंबर (हिं.स.)। येवला नगरपालिका निवडणुकीत मतदानाच्या दिवशी मतदारांना प्रलोभन म्हणून पैसे वाटप केल्याचा धक्कादायक प्रकार समोर आला आहे. आमदार दराडे यांच्या संस्थेत कार्यरत असलेल्या हनुमंत काशिनाथ बोरसे राहणार येवला वय २७ या कर्मचाऱ्याला पैशांचे वाटप करताना नागरिकांनी रंगेहात पकडले. घटनास्थळी मोठी गर्दी झाली त्यानंतर संतप्त नागरिकांनी संबंधित व्यक्तीस चांगलाच चोप दिला.

या घटनेची माहिती मिळताच निवडणूक आयोगाने तातडीने दखल घेऊन उल्लंघन झालेल्या आदर्श आचारसंहितेअंतर्गत कठोर कारवाई सुरू केली आहे. याबाबत येवला शहर पोलिसांनी संबंधित कर्मचाऱ्यावर लोकप्रतिनिधी कायदा १९५१ चे कलम १७१ (ब) (क), १२३ (१), भारतीय न्याय संहिता कलम १६९ अन्वये गुन्हा दाखल करत त्याला ताब्यात घेतले असून पुढील तपास सुरू आहे. अटक करण्यात आलेल्या कर्मचाऱ्याने प्राथमिक चौकशीत स्वतःचा संबंध शिवसेना (शिंदे गट) तसेच नगराध्यक्ष पदाचे उमेदवार रुपेश दराडे यांच्या गटाशी असल्याची कबुली दिली आहे. याबाबत स्वतंत्र चौकशी करण्यात येणार आहे.

पोलिसांनी दिलेल्या माहितीनुसार, सदर व्यक्ती मतदारांना रोख रक्कम देऊन मतदानावर परिणाम करण्याचा प्रयत्न करत होता. त्याच्याकडे १ लाख ९४ हजार रुपयांची रोख रक्कम, यादी व इतर संबंधित साहित्य आढळून आले असून सर्व साहित्य ताब्यात घेण्यात आले आहे. तसेच आणखी रोकड कुठे कुठे ठेवली ते पण पोलिस तपासणार आहे.

ही निवडणूक कायद्यानुसार अत्यंत गंभीर व दंडनीय बाब आहे. रोख पैसे वाटप, प्रलोभन देणे किंवा मत खरेदीस प्रोत्साहन देणे यासाठी कठोर शिक्षेची तरतूद आहे. त्यामुळे या प्रकरणात संबंधितांवर आणखी कारवाई होण्याची शक्यता वर्तवली जात आहे.

निवडणूक आयोगाची स्वतंत्र चौकशी

प्रकरण समोर आल्यानंतर निवडणूक आयोगाने तातडीने कारवाई केली असून, स्वतंत्र चौकशी समिती नेमण्यात आली आहे. कोणाच्या निर्देशावरून पैसे वाटले जात होते, यामागील आर्थिक स्रोत कोणता, तसेच यात आणखी कोणी सहभागी आहे का, याचा तपास सुरू आहे.

---------------

हिंदुस्थान समाचार / GOSAVI CHANDRASHEKHAR SUKDEV