देहू , 5 फेब्रुवारी (हिं.स.)।देहूत संत तुकाराम महाराजांचे अकरावे वंशज ह.भ.प शिरीष महाराज मोरे यांनी आज (५ फेब्रुवारी )सकाळी साडेआठच्या सुमारास राहत्या घरी आत्महत्या केली आहे.आर्थिक विवंचनेतून ही आत्महत्या झाल्याचा प्राथमिक अंदाज पोलिसांनी व्यक्त केला आहे. या घटनेमुळे देहू गावावर शोककळा पसरली आहे.

पोलिसांनी दिलेल्या माहितीनुसार, शिरीष महाराज मंगळवारी रात्री घरातील वरील खोलीत आराम करण्यासाठी गेले होते. सकाळी साडे आठ वाजल्यानंतरही ते खाली आले नव्हते. त्यामुळे घरातील सदस्य वरती गेले. दरवाजा वाजविला पण दार उघडले जात नव्हते. त्यामुळे दार तोडण्यात आले. यावेळी मोरे यांनी पंख्याच्या हुकाला उपरण्याने गळफास घेऊन आत्महत्या केल्याचे निदर्शनास आले. आत्महत्या करण्यापूर्वी त्यांनी चिठ्ठी लिहून ठेवली आहे. त्यात त्यांनी आर्थिक विवंचनेतून आत्महत्या करत असल्याचा उल्लेख केला आहे.

या घटनेची माहिती मिळताच देहू रोड पोलीस स्टेशन घटनास्थळी दाखल झाले.या प्रकरणी पोलिसांनी तपास सुरु केला असून मोरे यांच्या घरातून पोलिसांना एक चिट्ठी सापडली आहे. ही चिट्टी शिरीष महाराज यांनी आत्महत्येपूर्वी लिहून ठेवली होती. दरम्यान, प्राथमिक दृष्ट्या आर्थिक विवंचेनेतून आत्महत्येचे केल्याचे कळत असल्याचे देहूरोड पोलीस ठाण्याचे वरिष्ठ पोलीस निरीक्षक विक्रम बनसोडे यांनी सांगितले. याबाबत अधिक तपास देहूरोड पोलीस करीत आहेत.

शिरीष महाराज हे संत तुकाराम महाराजांचे अकरावे वंशज होते. तसेच त्यांचे निगडी येथे इडली उपहारगृह देखील होते. त्यांच्या पश्चात आई आणि वडील असा परिवार आहे. नुकताच त्यांचा टिळा झाला होता. २० फेब्रुवारीला रोजी मोरे यांचा विवाह होणार होता. आत्महत्येच्या घटनेमुळे देहूगावावर शोककळा पसरली आहे. घटनेचा अधिक तपास देहूरोड पोलीस करत आहेत.

---------------

हिंदुस्थान समाचार / Priyanka Bansode