दिंडोरी, 31 मे (हिं.स.)।
: तालुक्यातील नळवाडपाडा येथे घराच्या छतास लोखंडी पाइपला शिकार पंप बांधण्यास गेलेला युवा शेतकरी त्या पाइपमध्ये वीजप्रवाह उतरल्याने चिकटला. त्यास वाचविण्यास गेलेल्या पत्नीसही विजेचा धक्का बसला. युवा शेतकरी दाम्पत्य मृत झाल्याची दुर्दैवी घटना घडली. या घटनेने सर्वत्र हळहळ व्यक्त होत आहे. याबाबत मिळालेली माहिती अशी की नळवाडपाडा येथील साहेबराव चंदर महाले (29) हे वस्तीवर राहतात. गेल्या पंधरा दिवसांपासून सातत्याने पाऊस सुरू असून, गुरुवारी सकाळी आठच्या सुमारास झालेल्या पावसावेळी ते आपल्या घराचे पडवीच्या छताच्या लोखंडी पाइपला शिकार पंप बांधण्यास गेले. संबंधित पाइपमध्ये वीजप्रवाह उतरलेला होता. त्या विजेचा धक्का त्यास बसला, हे बघताच त्यांची पत्नी राणी (25) ही त्यांना वाचवण्यास गेली. तिलाही विजेचा शॉक बसला. नातेवाइकांनी त्यांना तत्काळ दिंडोरी ग्रामीण रुग्णालयात उपचारासाठी आणले. मात्र डॉक्टरांनी त्यांना मृत घोषित केले. पावसामुळे घराची पडवी पूर्ण ओली असल्याने विजेचा तीव्र शॉक बसत त्यांना वाचण्याची संधी मिळाली नाही. सदर महिला सात महिन्यांची गर्भवती होती. पोलिसांनी घटनेची नोंद केली आहे. युवा दाम्पत्याचा मृत्यू झाल्याने सर्वत्र हळहळ व्यक्त होत आहे. त्यांच्या पश्चात आई, भाऊ, दोन मुलगी, असा परिवार आहे.
---------------
हिंदुस्थान समाचार / CHANDRASHEKHAR SUKHDEV GOSAVI
