श्रीनगर, 30 जुलै (हिं.स.)। जम्मू-काश्मीरच्या गंदरबल जिल्ह्यात बुधवारी एक गंभीर दुर्घटना घडली. इंडो-तिबेटन बॉर्डर पोलिस (आयटीबीपी) जवानांना घेऊन जाणारी बस कुल्लान येथील सिंध नदीवरील पुलावरून खाली कोसळली. ही घटना मुसळधार पावसादरम्यान घडली, ज्यामुळे बचावकार्यात अडचणी येत आहेत.

अधिकाऱ्यांनी दिलेल्या माहितीनुसार, बसमधील सर्व जवानांची सुरक्षित सुटका करण्यात यश आले आहे. मात्र, बस चालक गंभीर जखमी झाला असून त्याच्यावर रुग्णालयात उपचार सुरू आहेत. बसमध्ये नेमके किती जवान होते, याबाबत अद्याप अधिकृत माहिती समोर आलेली नाही.

मिळालेल्या माहिती नुसार, दुर्घटनेचे कारण अद्याप स्पष्ट झालेले नसले तरी मुसळधार पावसामुळे रस्ता निसरडा झाल्याचा प्राथमिक अंदाज आहे.

दुर्घटनेनंतर स्टेट डिझास्टर रिस्पॉन्स फोर्स (एसडीआरएफ) आणि त्यांचा गुंड येथील सब-कम्पोनेंट यांनी संयुक्त बचावकार्य सुरू केले. बसमधील काही शस्त्रे नदीत वाहून गेल्याची माहिती आहे. आतापर्यंत तीन शस्त्रे सापडली असून उर्वरित शस्त्रांचा शोध सुरू आहे. मुसळधार पाऊस आणि सिंध नदीचा वेगवान प्रवाह यामुळे बचावकार्यात अडचणी येत आहेत.

स्थानिक प्रशासनाने दुर्घटनेची गंभीर दखल घेतली असून बचावकार्य पूर्ण होईपर्यंत सर्वतोपरी प्रयत्न केले जातील, असे अधिकाऱ्यांनी सांगितले. स्थानिक नागरिकांनीही बचावकार्यात मदत केली आहे. तपास पूर्ण झाल्यावर या दुर्घटनेविषयी सविस्तर अहवाल प्रसिद्ध केला जाईल.

सध्या जम्मू-काश्मीरमध्ये मुसळधार पाऊस आणि प्रतिकूल हवामानामुळे रस्ते अपघात व नैसर्गिक आपत्तींचा धोका वाढला आहे. अशा परिस्थितीत सुरक्षा दलांना अतिरिक्त सावधगिरी बाळगावी लागत आहे.

---------------

हिंदुस्थान समाचार / Suraj Chaugule