रत्नागिरी, 15 सप्टेंबर, (हिं. स.) : भांबेड (ता. लांजा) येथील नवयुग उत्कर्ष युवक मंडळाने आयोजित केलेल्या खुल्या गटातील जिल्हास्तरीय संगीत भजन स्पर्धेत राजापूर तालुक्यातील उपळे कदमवाडी येथील श्री ब्राह्मणदेव प्रासादिक भजन मंडळाने प्रथम क्रमांक पटकावला.
भांबेड पेठदेव येथील मंडळाचा ४४वा सार्वजनिक गणेशोत्सव उत्साहात झाला. यानिमित्त विविध स्पर्धांचे आयोजन केले होते. खुल्या संगीत भजन स्पर्धाही घेण्यात आल्या. त्यामध्ये जिल्ह्यातून ६ संघांनी सहभाग घेतला होता. स्पर्धेचे परीक्षण परशुराम गुरव व नारायण मिरजुळेकर यांनी केले.
स्पर्धेत प्रथम क्रमांकप्राप्त श्री ब्राह्मणदेव प्रासादिक भजन मंडळाला रोख रुपये १० हजार, चषक व प्रमाणपत्र देऊन गौरवण्यात आले. द्वितीय क्रमांक जय हनुमान प्रासादिक महिला भजन मंडळ, गावमळा ता. संगमेश्वर या मंडळाला रोख ७ हजार व चषक प्रमाणपत्र, तृतीय क्रमांक श्री सिद्धेश्वर प्रासादिक भजन मंडळ, तळवडे (ता. राजापूर) मंडळाला पाच हजार रुपये व चषक देण्यात आला. उत्कृष्ट पखवाज राघव संतोष चव्हाण, उत्कृष्ट कोरस श्री गजानन प्रासादिक भजन मंडळ (काटवली सुतारवाडी, ता. संगमेश्वर), उत्कृष्ट गायक स्वरूपा पाटणकर यांना रोख रक्कम, चषक व प्रमाणपत्र देऊन सन्मानित करण्यात आले.
---------------
हिंदुस्थान समाचार / रत्नागिरी
