गडचिरोली, 18 सप्टेंबर (हिं.स.)

पोलिसांच्या 'दादालोरा खिडकी' उपक्रमातून प्रशिक्षण घेतलेल्या विद्यार्थ्यांचा निरोप समारंभ गडचिरोली येथे पार पडला. या उपक्रमात सहभागी झालेल्या १२० हून अधिक विद्यार्थ्यांनी ४० दिवसांचे पोलीस भरतीपूर्व प्रशिक्षण पूर्ण केले.

गडचिरोली पोलीस दलाने तरुण-तरुणींना आत्मनिर्भर बनवण्यासाठी आणि त्यांना पोलीस भरतीत यशस्वी होण्यास मदत करण्यासाठी हा निवासी प्रशिक्षण कार्यक्रम सुरू केला आहे. हा कार्यक्रम ६ ऑगस्ट ते १८ सप्टेंबर या काळात आयोजित करण्यात आला होता. या १२व्या सत्रात एकूण १२५ उमेदवारांनी भाग घेतला.

प्रशिक्षणादरम्यान, उमेदवारांना पोलीस भरतीच्या दृष्टीने आवश्यक असलेले मैदानी चाचणी, लेखी परीक्षा, सायबर जनजागृती आणि महिला गुन्ह्यांशी संबंधित माहिती दिली गेली. तसेच, नवीन कायद्यांबद्दलही मार्गदर्शन करण्यात आले.

या प्रशिक्षणार्थींना गडचिरोली पोलिसांनी मोफत टी-शर्ट, शूज, तसेच लेखी परीक्षेसाठी आवश्यक पुस्तके आणि इतर साहित्य दिले. प्रशिक्षण पूर्ण झाल्यावर घेतलेल्या मैदानी व लेखी परीक्षेत उत्कृष्ट कामगिरी करणाऱ्या पहिल्या तीन विद्यार्थ्यांना पोलीस अधीक्षक श्री. नीलोत्पल यांच्या हस्ते पुष्पगुच्छ आणि प्रमाणपत्र देऊन गौरवण्यात आले.

पोलीस अधीक्षक नीलोत्पल यांचा संदेश

या समारंभात बोलताना पोलीस अधीक्षक नीलोत्पल यांनी विद्यार्थ्यांना पुढील पोलीस भरती ही एक सुवर्ण संधी मानून पुढील १०० दिवस जिद्दीने, मेहनतीने आणि चिकाटीने अभ्यास करण्याचा सल्ला दिला. त्यांनी मैदानी मेहनतीसोबतच लेखी अभ्यास आणि जागतिक घडामोडींबाबत अद्ययावत राहण्यावर भर दिला.

मागील वर्षातील यश आणि इतर उपक्रम गडचिरोली पोलीस दलाच्या या उपक्रमामुळे आत्तापर्यंत २,३१८ तरुण-तरुणींनी पोलीस भरतीपूर्व प्रशिक्षणाचा लाभ घेतला आहे. यापैकी २०५ उमेदवारांची शासनाच्या विविध विभागांत निवड झाली आहे.

याव्यतिरिक्त, गडचिरोली पोलीस दलाने इतर सामाजिक उपक्रमही राबवले आहेत. यामध्ये 'एक गाव, एक वाचनालय' या उपक्रमांतर्गत ७२ ठिकाणी वाचनालये सुरू केली आहेत. तसेच, 'पोलीस दादालोरा खिडकी' या माध्यमातून २०२१ पासून ११ लाखांहून अधिक नागरिकांना विविध सरकारी योजनांचा लाभ मिळवून देण्यात आला आहे.

---------------

हिंदुस्थान समाचार / Milind Khond