नाशिक, 18 सप्टेंबर, (हिं.स.)। यशवंतराव चव्हाण महाराष्ट्र मुक्त विद्यापीठातर्फे दिला जाणारा कुसुमाग्रज राष्ट्रीय साहित्य पुरस्कार (२०२४) यावर्षी प्रसिद्ध हिंदी कवी कुमार अंबुज यांना जाहीर करण्यात आला आहे. या पुरस्काराचे वितरण विद्यापीठाचे मा. कुलगुरू प्रा. संजीव सोनवणे यांच्या हस्ते येत्या बुधवार दिनांक २४ सप्टेंबर २०२५ रोजी सायंकाळी ६ वाजता नाशिक येथील कुसुमाग्रज स्मारकामधील विशाखा सभागृह येथे होणार आहे.

सन २०१० पासून सुरू झालेला हा पुरस्कार विद्यापीठाच्या कुसुमाग्रज अध्यासनामार्फत दरवर्षी एका निवडक अ-मराठी कवीला दिला जातो. यात रोख एक लाख रुपये, मानचिन्ह आणि मानपत्र दिले जाते. याआधी सुप्रसिद्ध कवी चंद्रकांत देवताले (हिंदी), के. सच्चिदानंदन (मलयाळम), सीतांशू यशश्चंद्र (गुजराथी), सुरजीत पातर (पंजाबी), श्रीमती टेमसुला आओ (इंग्रजी), विष्णू खरे (हिंदी), एच. एस. शिवप्रकाश (कन्नड), अमिताभ गुप्ता (बंगाली), नीलिमकुमार (आसामी) अशा अनेक दिग्गजांना या पुरस्काराने सन्मानित करण्यात आले आहे. यंदाच्या पुरस्कारासाठी विद्यापीठाचे मा. कुलगुरू प्रा. संजीव सोनवणे यांच्या अध्यक्षतेखालील निवड समितीने कवी कुमार अंबुज यांच्या नावाची एकमताने शिफारस केली. समितीत नामवंत कवी व अनुवादक प्रा. चंद्रकांत पाटील, डॉ. गोरख थोरात व डॉ. राजशेखर शिंदे यांचा समावेश होता. समितीचे समन्वयक म्हणून कुसुमाग्रज अध्यासनाचे प्रमुख डॉ. दिलीप धोंडगे यांनी काम पहिले, अशी माहिती विद्यापीठाचे कुलसचिव श्री. दिलीप भरड यांनी दिली आहे.

हिंदी कवी कुमार अंबुज यांचा परिचय :-

मध्यप्रदेशातील गुना येथील कवी कुमार अंबुज हे नव्वदनंतरच्या पिढीतील एक दमदार कवी, कथालेखक व समीक्षक म्हणून सुपरिचित आहेत. पण त्यांची ओळख प्राधान्याने कवी म्हणून अधिक आहे. त्यांचे आत्तापर्यंतचे पाच काव्यसंग्रह प्रकाशित झाले असून एक कवितांचे संकलन व संपादन प्रसिद्ध झाले आहे. त्यांना यापूर्वी मध्यप्रदेश साहित्य अकादमीच्या पुरस्कारासह अनेक पुरस्कारांनी सन्मानित करण्यात आले आहे.

---------------

हिंदुस्थान समाचार / हर्षदा गावकर