मॉस्को , 14 जानेवारी (हिं.स.)।इराणमध्ये सुरू असलेल्या सरकारविरोधी आंदोलनांच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांच्या वक्तव्यामुळे आंतरराष्ट्रीय राजकारणात नवी खळबळ उडाली आहे. ट्रम्प यांनी इराणी आंदोलनकर्त्यांना रस्त्यावर ठामपणे उभे राहण्याचे आवाहन करत, “मदत येत आहे”, असे म्हटले. यानंतर लगेचच रशियाने अमेरिकेला कडक इशारा दिला असून, इराणविरोधात कोणतेही नवे लष्करी पाऊल उचलल्यास त्याचे परिणाम विनाशकारी होतील, असे स्पष्ट केले आहे.

रशियाच्या परराष्ट्र मंत्रालयाने कठोर शब्दांत अमेरिकेला इशारा देत सांगितले की, इराणविरोधात नव्या लष्करी हल्ल्यांच्या धमक्या पूर्णपणे अस्वीकार्य आहेत. बाह्य शक्तींनी प्रेरित केलेल्या अस्थिरतेचे कारण पुढे करून जर पुन्हा हल्ला करण्यात आला, तर त्यातून मध्यपूर्वेतील तसेच जागतिक सुरक्षेला गंभीर धोका निर्माण होईल, असे मंत्रालयाने नमूद केले. रशियाने या प्रकाराला इराणच्या अंतर्गत बाबींमधील विध्वंसक हस्तक्षेप असे संबोधले आहे.

इराणमध्ये गेल्या अनेक आठवड्यांपासून सरकारविरोधी आंदोलने सुरू आहेत. अहवालांनुसार, सुरक्षा दलांच्या कारवाईत आतापर्यंत सुमारे २,००० लोकांचा मृत्यू झाला आहे. परिस्थिती नियंत्रणात आणण्यासाठी सरकारने कठोर उपाययोजना केल्या असून, त्यामुळे आंतरराष्ट्रीय स्तरावर मानवाधिकारांबाबत चिंता वाढली आहे. अमेरिका सातत्याने या आंदोलनांना नैतिक पाठिंबा देत आहे. ट्रम्प यापूर्वीही सांगून गेले आहेत की, इराणबाबत अमेरिकेकडे अत्यंत कडक पर्याय उपलब्ध आहेत.

रशियाच्या इशाऱ्यानंतर आणि ट्रम्प यांच्या वक्तव्यानंतर हे स्पष्ट झाले आहे की, इराणचा प्रश्न आता केवळ एका देशापुरता मर्यादित राहिलेला नाही. मध्यपूर्व आधीच अस्थिरतेच्या टप्प्यातून जात आहे. जर अमेरिकेने लष्करी कारवाईचा मार्ग स्वीकारला, तर त्याचे परिणाम केवळ इराणपुरते मर्यादित न राहता संपूर्ण प्रदेश आणि जागतिक सुरक्षा व्यवस्थेवरही गंभीर परिणाम करू शकतात. येत्या काळात कूटनीतीचा मार्ग निवडला जातो की संघर्षाचा, हे पाहणे अत्यंत महत्त्वाचे ठरणार आहे.

---------------

हिंदुस्थान समाचार / Priyanka Bansode