- कृषी अधिकाऱ्याने फेटाळले आरोप

वाशिम, 14 जानेवारी (हिं.स.) - येथील मंगरुळपीर तालुक्यातील गोगरी परिसरात मनरेगा योजनेंतर्गत संत्रा फळबागेचे अनुदान रखडले. याबाबत विचारणा करणाऱ्या शेतकऱ्याला तालुका कृषी अधिकाऱ्याने बुटाने व मातीच्या ढेकळाकने मारहाण केल्याची चित्रफित समाजमाध्यमांवर व्हायरल झाली आहे. दरम्यान तालुका कृषी अधिकारी सचिन कांबळे यांनी मात्र सर्व आरोप फेटाळले आहेत.

मिळालेल्या माहितीनुसार, गोगरी येथील शेतकरी ऋषिकेश पवार यांनी दोन वर्षांपूर्वी मनरेगा योजनेंतर्गत तीन एकर क्षेत्रावर संत्रा फळबाग लावली होती. या फळबागेसाठी शासनाकडून मिळणारे अनुदान मागील चार महिन्यांपासून रखडल्याचा त्यांचा आरोप आहे. अनुदान मिळण्यासाठी कृषी कार्यालयाकडे वारंवार पाठपुरावा करूनही अद्याप ठोस उत्तर मिळाले नसल्याचे त्यांचे म्हणणे आहे. दरम्यान, मंगरुळपीरचे तालुका कृषी अधिकारी सचिन कांबळे हे गोगरी शिवारात पाहणीसाठी आले असता, ऋषिकेश पवार यांनी त्यांच्याकडे प्रलंबित अनुदानाबाबत विचारणा केली. यावेळी दोघांमध्ये वाद झाल्याचे सांगण्यात येते. आरोपानुसार, जाब विचारत असताना तालुका कृषी अधिकाऱ्याने शेतकऱ्याच्या अंगावर धाव घेत बुटाने मारहाण केली. याशिवाय, शेतात पडलेली मातीची ढेकळे उचलून मारल्याचा आरोप करण्यात आला आहे.

या घटनेनंतर संबंधित अधिकाऱ्याने शेतकऱ्याला 'तुला गुन्ह्यात अडकवीन' अशी धमकी दिल्याचा आरोपही करण्यात आला आहे. घटनेची माहिती परिसरात पसरताच शेतकरी संघटनांचे पदधिकारी व स्थानिक शेतकऱ्यांनी तीव्र निषेध नोंदविला. या प्रकरणाची सखोल चौकशी करून दोर्षीवर कडक कारवाई करण्याची मागणी तालुक्यातील शेतकरी संघटनांनी केली आहे.

दुसरीकडे कृषी अधिकारी सचिन कांबळे यांनी स्पष्टीकरण करताना म्हटले की, गोगरी येथे एका शेतकऱ्याच्या शेतात तपासणी सुरू असताना इतर दोन व्यक्ती तेथे आल्या. त्यांनी महिला कर्मचाऱ्याशी उद्धट भाषेत संवाद साधला. त्यातील एक व्यक्ती महिला कर्मचाऱ्याच्या अंगावर धावली. तो संबंधित शेतकरीही नव्हता. परिस्थिती शांत करण्याचा प्रयत्न केला. मी अंगावर धावलो असलो, तरी मारहाण अजिबात केलेली नाही. माझ्यावरील आरोप पूर्णतः खोटे आहेत.

सचिन कांबळे गोगरी शेत शिवारात पाहणीसाठी आले होते. यावेळी शेतकरी ऋषिकेश पवार हे आपल्या मोबाईलवर या प्रक्रियेचे व्हिडिओ चित्रीकरण करत होते. व्हिडिओ काढताना पाहून अधिकारी कांबळे यांचा पारा चढला. त्यांनी व्हिडिओ का काढतो? असा सवाल करत शेतकऱ्याचा मोबाईल हिसकावून घेतला. तक्रारीचा राग मनात धरून अधिकाऱ्याने थेट शेतकऱ्याला मारहाण करण्यास सुरुवात केली. एवढेच नाही तर त्यांनी अंगावर धावून जात बूट उगारला आणि शिवीगाळही केली. या घटनेनंतर सचिन कांबळे यांच्यावर कठोर कारवाई करण्याची मागणी जोर धरू लागली आहे.

---------------

हिंदुस्थान समाचार / सुधांशू जोशी