मुंबई, 15 जानेवारी (हिं.स.) - राज्यात बहुप्रतिक्षित 29 महापालिका निवडणुकांसाठी मतदान पार पडली. दरम्यान भाजपा प्रदेशाध्यक्ष रवींद्र चव्हाण यांनी कल्याण डोंबिवलीत मतदानाचा हक्क बजावला. त्यावेळी रवींद्र चव्हाण यांच्या शर्टवर कमळाचं चिन्ह लावलेलं होतं. यावर शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी सोशल मीडियावर आक्षेप घेणारी एक पोस्ट केली. त्यात राऊत यांनी निवडणूक आयोगाला लक्ष्य केले. यावर उत्तर देताना राज्य निवडणूक आयुक्त दिनेश वाघमारे यांनी चौकशी करुन कारवाई करु, असं म्हटलं आहे.

रवींद्र चव्हाण यांच्या शर्टवर कमळाचं चिन्ह मतदानावेळी असल्याचे व्हिडिओ समोर आले आहेत. यावर राऊत म्हणाले की, निवडणूक आयोग झोपलाय की विकला गेलाय? भाजपा प्रदेश अध्यक्ष रवींद्रन लुंगीवाले छातीवर कमळ लावून मतदानास गेले हा आचार संहितेचा भंग आहे! यांच्यावर काय कारवाई होणार? मुख्यमंत्री ठेचून काढण्याची भाषा करतात, काढा यांना ठेचून.

राज्य निवडणूक आयुक्त दिनेश वाघमारे यांना संजय राऊत यांनी रवींद्र चव्हाण यांच्या संदर्भात केलेल्या पोस्टबाबत विचारण्यात आलं. यावर राज्य निवडणूक आयुक्त दिनेश वाघमारे यांनी चौकशी करुन कारवाई करु, असं म्हटलं आहे.

---------------

हिंदुस्थान समाचार / सुधांशू जोशी