विशाखापट्टणम, 29 जानेवारी (हिं.स.)न्यूझीलंडने चौथ्या टी-२० मध्ये भारताचा ५० धावांनी पराभव केला. सध्याच्या मालिकेतील हा पाहुण्या संघाचा पहिला विजय आहे. यापूर्वी टीम इंडियाने पहिल्या तीन सामन्यांमध्ये न्यूझीलंडला पराभूत करत मालिका जिंकली होती. विशाखापट्टणम येथे खेळल्या गेलेल्या सामन्यात न्यूझीलंडने नाणेफेक गमावल्यानंतर प्रथम फलंदाजी करण्याचा निर्णय घेत २० षटकांत ७ बाद २१५ धावा केल्या. टिम सेफर्टच्या अर्धशतकाच्या जोरावर भारताचा डाव १८.४ षटकांत १६५ धावांवर संपला. शिवम दुबेने संघासाठी ६५ धावांची दमदार खेळी केली. या सामन्यानंतर भारत मालिकेत आता ३-१ने आघाडीवर आहे.

२१६ धावांच्या लक्ष्याचा पाठलाग करताना भारतीय संघाची सुरुवात खराब झाली. अभिषेक शर्मा डावाच्या पहिल्याच चेंडूवर बाद झाला आणि त्यानंतर लगेचच कर्णधार सूर्यकुमार यादवही स्वस्तात परतला. सुरुवातीच्या अपयशानंतर भारतावर दबाव आला. त्यानंतर रिंकू सिंग आणि संजू सॅमसन यांनी डाव स्थिर करण्याचा प्रयत्न केला. पण कोणताही फलंदाज धावगती वाढवू शकला नाही. रिंकू ३९ धावांवर एलबीडब्ल्यू झाला, तर सॅमसन २४ धावांवर क्लीन बोल्ड झाला. हार्दिक पंड्या देखील योगदान देऊ शकला नाही आणि भारताने ११ षटकांत ८२/५ अशी मजल मारली होती.

शिवम दुबेने एक बाजू लावून धरत आक्रमक फलंदाजी केली. त्याने गोलंदाजांवर दबाव कायम ठेवला. विशेषतः लेग-स्पिनर ईश सोधीच्या एका षटकात २९ धावा काढून सामन्यात जीवदान दिले. दुबेने फक्त १५ चेंडूत आपले अर्धशतक पूर्ण केले आणि २३ चेंडूत ६५ धावांची शानदार खेळी केली. त्याच्या या खेळीत सात षटकारांचा समावेश होता. पण त्याला दुसऱ्या बाजूने अपेक्षित असलेली साथ मिळाली नाही. त्याने हर्षित राणासोबत सहाव्या विकेटसाठी ६३ धावांची भागीदारी केली. पण राणाचे योगदान मर्यादित होते. दुबे दुर्दैवी धावबाद झाल्याने भारताच्या आशा धुळीस मिळाल्या. संपूर्ण संघ १८.४ षटकांत १६५ धावांवर बाद झाला आणि ५० धावांनी पराभव पत्करावा लागला. या पराभवानंतरही भारत मालिकेत ३-१ अशी आघाडीवर आहे.

तत्पूर्वी, न्यूझीलंडने आक्रमक सुरुवात केली. सलामीवीर टिम सेफर्ट आणि डेव्हॉन कॉनवे यांनी सुरुवातीपासूनच भारतीय गोलंदाजांवर दबाव आणला. सेफर्टने डावाच्या पहिल्याच षटकात आक्रमक दृष्टिकोन स्वीकारला, वेगवान गोलंदाज अर्शदीप सिंगच्या एका षटकात सलग तीन चौकार मारले. त्यानंतर त्याने हर्षित राणा आणि जसप्रीत बुमराहविरुद्ध काही उत्कृष्ट फटके मारले. न्यूझीलंडने फक्त चार षटकांत ५० धावा केल्या आणि पॉवरप्लेच्या अखेरीस एकही विकेट न गमावता ७१ धावा केल्या.

सेफर्टने ३६ चेंडूत ६२ धावांची स्फोटक खेळी केली, ज्यामध्ये सात चौकार आणि तीन षटकारांचा समावेश होता. दुसऱ्या टोकाला, कॉनवेने सुरुवातीला सावधपणे खेळ केला पण नंतर रवी बिश्नोईच्या एका षटकात एक चौकार आणि एक षटकार मारून वेग वाढवला. दोघांनी पहिल्या विकेटसाठी १०० धावांची भागीदारी केली. तथापि, कॉनवे ४४ धावांवर बाद झाल्यावर कुलदीप यादवने ही भागीदारी मोडली. त्यानंतर भारतीय गोलंदाजांनी मधल्या षटकांमध्ये पुनरागमन केले आणि नियमित अंतराने विकेट्स घेतल्या, ज्यामुळे न्यूझीलंडचा डाव डळमळीत झाला.

मधल्या फळीत विकेट्स पडल्या तरी, शेवटच्या षटकांमध्ये डॅरिल मिशेलने जबाबदारी सांभाळली. त्याने १८ चेंडूत नाबाद ३९ धावा केल्या आणि डेथ ओव्हरमध्ये महत्त्वाचे षटकार मारून संघाला २०० धावांचा टप्पा ओलांडून दिला. न्यूझीलंडने २० षटकांत ७ बाद २१५ धावा केल्या, जे भारतासाठी मोठे लक्ष्य होते.

---------------

हिंदुस्थान समाचार / वृषाली देशपांडे