नवी दिल्ली , 05 जानेवारी (हिं.स.)।पंतप्रधान नरेंद्र मोदी 11 जानेवारी रोजी गुजरातमधील प्रसिद्ध सोमनाथ मंदिराला भेट देणार आहेत. या दौऱ्यादरम्यान ते 8 ते 11 जानेवारी दरम्यान आयोजित करण्यात येणाऱ्या सोमनाथ स्वाभिमान पर्व या कार्यक्रमात सहभागी होतील. या चार दिवसांच्या उत्सवात आध्यात्मिक, सांस्कृतिक आणि सामाजिक उपक्रमांची मालिका आयोजित करण्यात आली आहे.

अधिकाऱ्यांनी सांगितले की या निमित्ताने ‘सोमनाथ स्वाभिमान पर्वा’अंतर्गत वर्षभर चालणाऱ्या विविध कार्यक्रमांची सुरुवात केली जाणार आहे. या पर्वाचा उद्देश भारताची प्राचीन सांस्कृतिक परंपरा, श्रद्धा आणि आत्मसन्मानाची भावना अधिक बळकट करणे हा आहे. कार्यक्रमादरम्यान धार्मिक विधी, आध्यात्मिक प्रवचने, सांस्कृतिक सादरीकरणे तसेच सामाजिक जनजागृतीशी संबंधित उपक्रम आयोजित केले जाणार आहेत.

पंतप्रधानांच्या दौऱ्याच्या पार्श्वभूमीवर स्थानिक प्रशासन आणि सोमनाथ ट्रस्टकडून तयारीला वेग देण्यात आला आहे. सुरक्षा व्यवस्थेसह भाविकांच्या सोयीसुविधांकडे विशेष लक्ष दिले जात आहे.

यापूर्वी पंतप्रधान नरेंद्र मोदी सांगून गेले आहेत की वारंवार परकीय आक्रमणांना सामोरे जाऊनही पुन्हा उभे राहिलेले सोमनाथ मंदिर हे भारतीय संस्कृतीच्या अढळ आणि अटळ आत्मबळाचे प्रतीक आहे. अलीकडेच लिहिलेल्या एका लेखात त्यांनी नमूद केले होते की, सोमनाथपेक्षा भारतीय संस्कृतीच्या अजेय भावनेचे उत्तम उदाहरण दुसरे कोणतेही नाही, जी असंख्य संकटे आणि संघर्ष असूनही अभिमानाने उभी आहे.

---------------

हिंदुस्थान समाचार / Priyanka Bansode