नवी दिल्ली, 15 ऑक्टोबर (हिं.स.)भारतीय संघ लवकरच न्यूझीलंडच्या मोठ्या दौऱ्यासाठी रवाना होणार आहे. या दौऱ्यात भारत पाच टी-२०, पाच एकदिवसीय आणि अखेरीस दोन कसोटी सामने खेळणार आहे. श्रेयस अय्यरच्या नेतृत्वाखालील टी-२० संघ जाहीर झाला असून, त्यातून जसप्रीत बुमराहला वगळण्यात आले आहे. आता अशी माहिती आहे की, बुमराह एकदिवसीय मालिकाही मुकण्याची शक्यता आहे, कारण भारतीय संघाचे व्यवस्थापन न्यूझीलंड दौऱ्यातील कसोटी मालिकेला प्राधान्य देत आहे. व्यवस्थापनाला बुमराहला कोणत्याही परिस्थितीत तंदुरुस्त ठेवायचे आहे आणि त्यामुळेच तो एकदिवसीय मालिकाही मुकण्याची शक्यता आहे.

भारतीय संघ न्यूझीलंड दौऱ्यावर सर्वप्रथम टी-२० मालिका खेळेल. ही मालिका २२ ऑक्टोबर रोजी सुरू होईल आणि अंतिम टी-२० सामना १ नोव्हेंबर रोजी होईल. त्यानंतर ४ नोव्हेंबर रोजी एकदिवसीय मालिका सुरू होईल. दरम्यान, इंडिया 'अ' चा क्रिकेट संघ न्यूझीलंड 'अ' संघाविरुद्ध एक-दोन नव्हे, तर तीन बहुदिवसीय सामने खेळणार आहे. पहिला सामना २४ ऑक्टोबरपासून, दुसरा ३१ ऑक्टोबरपासून आणि तिसरा ७ नोव्हेंबर ते १० नोव्हेंबर दरम्यान खेळवला जाणार आहे.

भारतीय कसोटी संघात निवडले जाणारे बहुतेक क्रिकेटपटू या तीन चार दिवसीय सामन्यांमध्ये खेळतील. दरम्यान, बुमराह ७ नोव्हेंबरपासून इंडिया 'अ' संघाकडून क्रिकेट खेळताना दिसू शकतो. यावरून हे स्पष्ट होते की, बुमराह पुन्हा एकदिवसीय संघाचा भाग असणार नाही. इंडिया 'अ' संघाकडून सामने खेळल्यानंतर, तो १९ नोव्हेंबरपासून भारतासाठी आपली पहिली कसोटी खेळू शकतो.

न्यूझीलंड दौऱ्यासाठी भारताचे एकदिवसीय आणि कसोटी संघ येत्या काही दिवसांत जाहीर होण्याची शक्यता आहे. निवड समिती हर्षित राणा, प्रसिद्ध कृष्णा आणि ऋषभ पंत यांसारख्या क्रिकेटपटूंच्या तंदुरुस्ती आणि उपलब्धतेबाबतच्या माहितीची वाट पाहत आहे.

---------------

हिंदुस्थान समाचार / वृषाली देशपांडे