मुंबई, 16 ऑक्टोबर (हिं.स.)। नवरात्री म्हणजे केवळ देवीची पूजा आणि आराधना नव्हे, तर प्रत्येक स्त्रीमध्ये असलेल्या सामर्थ्याचा उत्सव. आयुष्यात कितीही आव्हानं आली, तरी त्यांचा धैर्याने सामना करत स्वतःच्या पायावर खंबीरपणे उभं राहणाऱ्या स्त्रियांमध्येही देवीचं रूप पाहायला मिळतं. स्वतःच्या स्वप्नांसाठी झटताना, आपल्या माणसांची काळजी घेताना आणि कठीण प्रसंगांतून मार्ग काढताना स्त्रिया आपल्यातील शक्तीची ओळख करून देतात. झी मराठीवरील *'कमळी'* मालिकेत *'अनिका'* ही व्यक्तिरेखा साकारणारी *अभिनेत्री केतकी कुलकर्णी* ने आपल्या आयुष्यातील अनुभवांतून स्त्रीशक्तीचा असाच अर्थ उलगडला आहे. त्वचेच्या समस्येचा सामना करतानाही स्वतःवरचा विश्वास कायम ठेवणाऱ्या केतकीसाठी तिच्यातील आत्मविश्वास आणि जिद्द हीच तिची खरी शक्ती आहे.
केतकी कुलकर्णी सांगते,“माझ्यासाठी स्त्रीशक्ती म्हणजे स्वतःसाठी उभं राहण्याची धमक आणि स्वतःच्या निर्णयांवर ठाम राहण्याची हिंमत, कुठल्याही परिस्थितीत स्वतःला हरवू न देण्याची ताकद. माझ्यासाठी स्त्रीशक्ती म्हणजे फक्त स्ट्राँग असणं नाही, तर गरज पडली तर स्वतःसाठी आणि आपल्या कुटुंबासाठी खंबीरपणे उभं राहणं आहे. मला वाटतं की आजच्या काळात प्रत्येक मुलीने आणि स्त्रीने सगळ्यात जास्त स्वतःवर विश्वास ठेवावा. लोक काय म्हणतात याकडे लक्ष न देता, न घाबरता पुढे चालत राहावं. सध्या माझ्या त्वचेची समस्या सुरूआहे आणि मी अजूनही त्यातून सावरण्याच्या प्रक्रियेत आहे. त्यासाठी मी स्वतःवर विश्वास ठेवते आणि माझ्यातील शक्तीची मला जाणीव आहे. खूप कठीण काळातून मी याच शक्तीच्या जोरावर पुढे आले आहे. प्रत्येक स्त्रीने स्वतःचे गुण जपले पाहिजेत, स्वतःमधील शक्ती आणि आत्मविश्वास जपला पाहिजे. स्वतःवरचा विश्वास आणि स्वतःची शक्ती, हीच प्रत्येक स्त्रीची स्त्रीशक्ती आहे, असं म्हणायला हरकत नाही.
नवरात्रीच्या निमित्ताने आजच्या मुलींना आणि महिलांना मला हाच संदेश द्यायला आवडेल की, आपण अनेकदा शारीरिक वेदना आणि पीसीओडी, थायरॉईड यांसारख्या आरोग्याच्या समस्यांना सामोरं जात असतो. अशा वेळी खचून न जाता स्वतःसाठी प्रयत्न करा, स्वतःसाठी लढा आणि स्वतःची काळजी घ्या. जवळचे लोक आपल्याला सहकार्य करतात, पण शेवटी स्वतःसाठी आपल्यालाच उभं राहावं लागतं. त्यामुळे खंबीर राहा आणि मनमोकळेपणाने आयुष्य जगा. आयुष्य खूप सुंदर आहे.
मी खूप लहानपणापासून अभिनय क्षेत्रात काम करत आहे. या प्रवासात अनेक चढ-उतार अनुभवले. प्रत्येक वेळी स्वतःला सावरून पुन्हा उभं राहणं आणि पुढे जाणं मी शिकले. अनेक गोष्टी कठीण वाटल्या, तरी स्वतःवर विश्वास ठेवून मी त्यांचा सामना केला. मला असं वाटतं की, स्त्रीने जर काही ठरवलं, तर ती काहीही करू शकते. तिच्यासाठी काहीच अशक्य नाही. माझ्या करिअरमध्ये स्वतःवर विश्वास ठेवून आजपर्यंत मी पुढे येत राहिले आणि यापुढेही अशीच वाटचाल करत राहीन. या प्रवासात मला देवी शक्ती आणि स्त्रीशक्ती जाणवते. देवी आई आणि माझे बाप्पा कायम माझ्या पाठीशी आहेत, याची मला जाणीव आहे. प्रत्येक स्त्रीमध्ये एक दैवी शक्ती असते आणि त्या शक्तीच्या जोरावर ती आयुष्यात सतत पुढे जाऊ शकते, असा माझा विश्वास आहे.”
केतकी कुलकर्णीचे विचार या नवरात्रीत प्रत्येक स्त्रीला स्वतःमधील शक्ती ओळखण्याची आणि स्वतःवरचा विश्वास अधिक दृढ करण्याची प्रेरणा देतात. कारण स्त्रीशक्ती ही केवळ संकटांचा सामना करण्यापुरती मर्यादित नसून, स्वतःच्या आयुष्याला आत्मविश्वासाने दिशा देण्याची ताकदही आहे.
---------------
हिंदुस्थान समाचार / हर्षदा गावकर
16 Oct 2026
