अबू धाबी, 20 ऑक्टोबर (हिं.स.) अबू धाबी येथील शेख झायेद स्टेडियमवर अफगाणिस्तानने झिम्बाब्वेचा १५८ धावांनी पराभव केला. सेदिकुल्ला अटलचे शतक आणि रशीद खानने घेतलेल्या चार बळींमुळे अफगाणिस्तानचा नेट रन रेट +३.१६० वर पोहोचला आहे. यामुळे आता अंतिम सामन्यातील दुसऱ्या जागेसाठी झिम्बाब्वे आणि बांगलादेश यांच्यात चुरस पाहायला मिळणार आहे.

२९५ धावांच्या लक्ष्याचा पाठलाग करताना, झिम्बाब्वेला केवळ १९६ धावांची गरज होती, ज्यामुळे शुक्रवारी (२३ ऑक्टोबर) होणारा अंतिम सामना पुन्हा एकदा याच दोन संघांमधील लढत ठरू शकला असता. मात्र, त्यांचा संपूर्ण संघ अवघ्या १३६ धावांत गारद झाला. झिम्बाब्वेची सुरुवात अत्यंत खराब झाली. तिसऱ्या षटकात फजलहक फारुकीने एका शानदार इनस्विंगर चेंडूवर बेन करनला त्रिफळाचीत केले, तर सातव्या षटकात त्याने तफादज्वा त्सिगालाही बाद केले.

एका बाजूने ब्रायन बेनेट आक्रमक फलंदाजी करत होता, तर दुसऱ्या बाजूने विकेट्स पडण्याचे सत्र सुरूच होते. आठव्या षटकाच्या सुरुवातीला ब्रेंडन टेलर धावबाद झाला. त्यानंतर १३ व्या षटकात ए.एम. गझनफरने बेनेटला पायचीत केले. यामुळे झिम्बाब्वेची अवस्था ४ बाद ४३ अशी झाली होती.अशा परिस्थितीत त्यांनी २९५ धावांचे लक्ष्य गाठण्याचा विचार सोडून, किमान १९६ धावांपर्यंत पोहोचण्याचे ध्येय ठेवले असावे.

रायन बर्ल आणि सिकंदर रझा यांनी ६४ धावांची भागीदारी करत संघाला सावरण्याचा प्रयत्न केला. ७८ चेंडूंनंतर एक चौकार मारत त्यांनी ३० व्या षटकात संघाला १०० धावांचा टप्पा ओलांडून दिला. मात्र, जेव्हा आशा निर्माण झाली होती, तेव्हाच रशीद खानने बर्लला पायचीत करून ही भागीदारी तोडली. त्यानंतरच्या प्रत्येक षटकात रशीदने बळी मिळवले. विशेषतः ३६ व्या षटकात त्याने सिकंदर रझाला त्रिफळाचीत करून विजयावर शिक्कामोर्तब केले. ३९ व्या षटकात वेलिंग्टन मसाकाद्झा धावबाद झाल्यामुळे झिम्बाब्वेचा डाव संपुष्टात आला.

अफगाणिस्तानने प्रथम फलंदाजी करण्याचा निर्णय घेतल्यानंतर त्यांच्या सलामीवीरांनी संघाला उत्कृष्ट सुरुवात करून दिली. दोन्ही सलामीवीरांनी चौकारांसह डावाची सुरुवात केली आणि अवघ्या सात षटकांत ५० धावांची भागीदारी रचली; त्यानंतर रहमानुल्ला गुरबाज चेंडू स्टंपवर आदळल्यामुळे बाद झाला. मात्र, झिम्बाब्वेला फारसा दिलासा मिळाला नाही, कारण इब्राहिम झद्रानने अत्यंत सहजतेने फलंदाजी केली, तर सेदिकुल्ला अटलनेही खेळात स्वतःला स्थिरावले. या जोडीने अतिशय संयमाने शतकी भागीदारी पूर्ण केली आणि यादरम्यान दोघांनीही आपापली अर्धशतके साजरी केली.

३२ व्या षटकापर्यंत अफगाणिस्तानने धावगती वाढवली होती, तेव्हा ब्रॅड इव्हान्सने इब्राहिम झद्रानला बाद करून ही भागीदारी तोडली; झद्रान त्याचे शतक पूर्ण करण्यापासून १० धावा दूर होता. त्यानंतर रहमत शाह आणि अजमतुल्ला ओमरझाई दोघेही लागोपाठ बाद झाल्यामुळे अफगाणिस्तान अडचणीत सापडला, पण अटल आणि हशमतुल्ला शाहिदी यांच्यातील ४२ धावांच्या भागीदारीने संघाला पुन्हा सावरले.

अटलने ४४ व्या षटकात आपल्या कारकिर्दीतील तिसरे एकदिवसीय शतक पूर्ण केले, मात्र पुढच्याच षटकात तो धावबाद झाला. अफगाणिस्तानने शेवटच्या चार षटकांत पाच चौकार मारले, पण त्याच वेळी पाच विकेट्सही गमावल्या. आणि त्यांना ३०० धावांचा टप्पा गाठता आला नाही. तरीही, त्यांनी उभारलेली २९४ धावांची एकूण धावसंख्या विजयासाठी पुरेशी ठरली.

---------------

हिंदुस्थान समाचार / वृषाली देशपांडे