नवी दिल्ली, 28 ऑक्टोबर (हिं.स.)। देशांतर्गत शेअर बाजारात बुधवारी दिवसभर मोठ्या प्रमाणात चढ-उतार पाहायला मिळाले. माहिती तंत्रज्ञान क्षेत्रातील समभागांची जोरदार विक्री आणि आंतरराष्ट्रीय बाजारात कच्च्या तेलाच्या किमतीत झालेली वाढ यामुळे बाजारावर दबाव निर्माण झाला. मात्र, खालच्या स्तरावर गुंतवणूकदारांनी केलेल्या खरेदीमुळे सेन्सेक्स आणि निफ्टीने घसरणीतून सावरण्याचा प्रयत्न केला. सेन्सेक्सने दिवसाच्या नीचांकी स्तरावरून सुमारे ९२२ अंकांची आणि निफ्टीने २८० अंकांची सुधारणा नोंदवली. असे असले तरी दिवसअखेर दोन्ही प्रमुख निर्देशांक घसरणीसह बंद झाले. विशेष म्हणजे, प्रमुख निर्देशांक घसरले असतानाही मध्यम आणि लघुभांडवली समभागांमधील तेजीमुळे गुंतवणूकदारांच्या संपत्तीत तब्बल १२ लाख कोटी रुपयांहून अधिक वाढ झाली.

मुंबई शेअर बाजाराचा सेन्सेक्स ३४५.२३ अंकांच्या घसरणीसह ७३,२५३.४४ अंकांवर उघडला. व्यवहाराच्या सुरुवातीपासूनच विक्रीचा दबाव वाढल्याने सेन्सेक्स ९९५.१० अंकांनी घसरून ७२,६०३.५७ अंकांच्या नीचांकी स्तरावर पोहोचला. त्यानंतर गुंतवणूकदारांनी खालच्या स्तरावर खरेदी सुरू केल्याने बाजाराला आधार मिळाला. या खरेदीमुळे सेन्सेक्सने नीचांकी स्तरावरून ९२१.८७ अंकांची सुधारणा करत ७३,५२५.४४ अंकांची उच्चांकी पातळी गाठली. मात्र, व्यवहाराच्या अखेरच्या टप्प्यात पुन्हा विक्रीचा जोर वाढला. परिणामी, सेन्सेक्स ३५२.६४ अंक अर्थात ०.४८ टक्क्यांच्या घसरणीसह ७३,२४६.०३ अंकांवर बंद झाला.

राष्ट्रीय शेअर बाजाराचा निफ्टीदेखील घसरणीसह २२,६७८ अंकांवर उघडला. सुरुवातीच्या विक्रीमुळे तो २२,४९७.७० अंकांपर्यंत खाली आला. त्यानंतर झालेल्या खरेदीमुळे निफ्टीने जोरदार पुनरागमन केले आणि २२,७७८.०५ अंकांची उच्चांकी पातळी गाठली. मात्र, अखेरच्या तासातील विक्रीमुळे ही तेजी टिकू शकली नाही. दिवसअखेर निफ्टी ५०.९० अंक अर्थात ०.२२ टक्क्यांच्या घसरणीसह २२,६९८.८५ अंकांवर स्थिरावला.

क्षेत्रनिहाय व्यवहारात माहिती तंत्रज्ञान आणि दैनंदिन वापराच्या ग्राहकोपयोगी वस्तू क्षेत्रातील समभागांमध्ये घसरण झाली. निफ्टी माहिती तंत्रज्ञान निर्देशांक १.९८ टक्के, तर ग्राहकोपयोगी वस्तू निर्देशांक ०.५६ टक्क्यांनी घसरला. दुसरीकडे, वाहन क्षेत्रात १.४५ टक्के, औषधनिर्माण क्षेत्रात १.०४ टक्के आणि बँकिंग क्षेत्रात ०.५४ टक्क्यांची वाढ नोंदवण्यात आली. मध्यम भांडवली समभागांचा निर्देशांक ०.४३ टक्के, तर लघुभांडवली समभागांचा निर्देशांक ०.९० टक्क्यांनी वधारला.

दरम्यान, मुंबई शेअर बाजारात नोंदणीकृत कंपन्यांचे एकूण बाजारमूल्य वाढून ४,७२,६२,८६२.४६ कोटी रुपयांवर पोहोचले. मागील दिवशी हे मूल्य ४,६०,५८,३०३.१८ कोटी रुपये होते. त्यामुळे एका दिवसात गुंतवणूकदारांच्या संपत्तीत १२,०४,५५९.२८ कोटी रुपयांची भर पडली.

समभागांच्या कामगिरीत अपोलो हॉस्पिटल्स, लार्सन अँड टुब्रो, ट्रेंट, एसबीआय लाइफ इन्शुरन्स आणि इंडिगो यांच्या समभागांत तेजी दिसली. दुसरीकडे, इन्फोसिस, रिलायन्स इंडस्ट्रीज, ओएनजीसी, टेक महिंद्रा आणि भारती एअरटेल यांच्या समभागांत घसरण झाली. त्यामुळे प्रमुख निर्देशांक घसरले असले, तरी व्यापक बाजारातील खरेदीमुळे गुंतवणूकदारांसाठी हा दिवस दिलासादायक ठरला.

---------------

हिंदुस्थान समाचार / Suraj Chaugule