मुंबई, २८ ऑक्टोबर (हिं.स.) — अभिनेता कार्तिक आर्यन दिग्दर्शक विवेक अग्निहोत्री यांच्या 'ऑपरेशन सिंदूर' या चित्रपटात मुख्य भूमिकेत दिसण्याची शक्यता आहे. मात्र, त्याच्या सहभागाबाबत निर्मात्यांकडून अद्याप कोणतीही अधिकृत घोषणा करण्यात आलेली नाही. विवेक यांनी या चित्रपटाची घोषणा यावर्षी मार्च महिन्यात केली होती. हा चित्रपट लेफ्टनंट जनरल के.जे.एस. 'टायनी' ढिल्लन यांनी लिहिलेल्या 'ऑपरेशन सिंदूर: द अनटोल्ड स्टोरी ऑफ इंडियाज डीप स्ट्राइक्स इनसाइड पाकिस्तान' या पुस्तकावर आधारित आहे.
मिळालेल्या माहितीनुसार, कार्तिक सध्या दिग्दर्शक शिमित अमीन यांच्या 'कॅप्टन इंडिया' या चित्रपटाच्या कामात व्यस्त आहे, जो येमेनमधील हुथी संघर्षाच्या पार्श्वभूमीवर आधारित आहे. हा प्रकल्प पूर्ण केल्यानंतर, तो 'ऑपरेशन सिंदूर'च्या तयारीला सुरुवात करेल अशी अपेक्षा आहे. 'द काश्मीर फाइल्स' आणि 'द वॅक्सिन वॉर' सारख्या चित्रपटांसाठी ओळखले जाणारे विवेक अग्निहोत्री आणि कार्तिक आर्यन यांच्यातील हे पहिलेच सहकार्य ठरेल. या चित्रपटाची निर्मिती भूषण कुमार यांची 'टी-सीरीज' आणि विवेक अग्निहोत्री यांची 'आय ॲम बुद्धा प्रॉडक्शन्स' संयुक्तपणे करत आहेत.
विवेक यांच्या म्हणण्यानुसार, 'ऑपरेशन सिंदूर' हा केवळ एक सामान्य देशभक्तीपर किंवा ॲक्शन-ड्रामा चित्रपट नसेल. घटनांचे चित्रण अत्यंत वास्तववादी पद्धतीने व्हावे यासाठी सखोल संशोधन केले जात आहे. या चित्रपटाची कथा पहलगाम दहशतवादी हल्ला आणि त्यानंतर भारतीय सैन्याने केलेल्या प्रत्युत्तरादाखल लष्करी कारवाईवर आधारित आहे. असे सांगितले जात आहे की, ६ मे ते १० मे २०२५ या कालावधीत पार पडलेल्या एका मोहिमेतील घटना या चित्रपटात प्रामुख्याने दाखवल्या जातील. आता प्रेक्षक अधिकृत कास्टिंग घोषणा आणि चित्रपटाबद्दलच्या पुढील तपशीलांची प्रतीक्षा करत आहेत.
---------------
हिंदुस्थान समाचार / हर्षदा गावकर
