रायगड, 04 ऑक्टोबर (हिं.स.)। रोहा तालुक्यातील खैरेखुर्द येथील राजिप प्राथमिक उर्दू शाळेच्या नादुरुस्त इमारतीमुळे गेल्या तीन वर्षांपासून विद्यार्थ्यांची बसण्याची गैरसोय होत आहे. अखेर या समस्येची दखल घेत शाळेच्या नवीन इमारतीसाठी ३७ लाख रुपयांचा निधी मंजूर करण्यात आला असून, या इमारतीचे बांधकाम दोन महिन्यांत पूर्ण करून लोकार्पण करण्यात यावे, अशा सूचना खासदार सुनील तटकरे यांनी दिल्या.

२ ऑक्टोबर २०२६ रोजी खासदार सुनील तटकरे यांच्या हस्ते नवीन इमारतीचे भूमिपूजन करण्यात आले. बांधकाम दर्जेदार आणि वेळेत पूर्ण करण्याची जबाबदारी ग्रामपंचायतीने घ्यावी, असे आवाहन तटकरे यांनी सरपंच मुजम्मील गीते यांना केले. विद्यार्थ्यांची गैरसोय लवकरात लवकर दूर करण्यावर त्यांनी भर दिला.

२२ जुलै २०२३ रोजी आलेल्या तौक्ते वादळात शाळेच्या चार वर्गखोल्यांच्या इमारतीतील स्लॅबच्या प्लास्टरचा काही भाग कोसळला होता. त्यावेळी जिल्हाधिकाऱ्यांनी शाळांना सुट्टी जाहीर केल्याने मोठी दुर्घटना टळली होती. सुमारे २० वर्षे जुन्या इमारतीच्या दुरुस्ती अथवा पुनर्बांधणीची मागणी शाळा व्यवस्थापन समिती आणि ग्रामस्थांकडून सातत्याने करण्यात येत होती.

ॲड. मनोजकुमार शिंदे व रामचंद्र सकपाळ यांच्या प्रयत्नांनंतर निधी मंजूर झाला. “खैरेखुर्द ग्रामस्थांच्या विविध प्रश्नांसाठी सदैव खंबीरपणे पाठिशी राहणार,” असे ॲड. शिंदे यांनी सांगितले. यावेळी राजिपचे उपाध्यक्ष मधुकर पाटील, पंचायत समिती सभापती पाशीलकर, गटविकास अधिकारी, गटशिक्षण अधिकारी, शिक्षक, पालक, राष्ट्रवादी काँग्रेसचे पदाधिकारी आणि ग्रामस्थ मोठ्या संख्येने उपस्थित होते. कार्यक्रमाचा समारोप शाळा व्यवस्थापन समितीचे अध्यक्ष अब्दुल हमीद गीते यांच्या आभार प्रदर्शनाने झाला.

---------------

हिंदुस्थान समाचार / संदेश साळुंके (रायगड)