काठमांडू, 12 नोव्हेंबर (हिं.स.)।नेपाळमधील मकवानपूर जिल्ह्यात गुरुवारी सकाळी भीषण अपघात झाला. भीमफेदी गावपालिका-६ येथील चिसापानी गढीजवळ प्रवाशांनी भरलेली इलेक्ट्रिक व्हॅन चालकाच्या नियंत्रणाबाहेर जाऊन खोल दरीत कोसळली. या दुर्घटनेत किमान १० जणांचा मृत्यू झाला असून अन्य चार जण जखमी झाले आहेत.

जिल्ह्यात तैनात असलेल्या सशस्त्र पोलीस दलाचे (एपीएफ) पोलीस अधीक्षक निवान कुमार खडका यांनी दिलेल्या माहितीनुसार, मृतांमध्ये पाच पुरुष, तीन महिला आणि दोन लहान मुलांचा समावेश आहे. गुरुवारी सकाळी ही व्हॅन भीमफेदी ग्रामीण नगरपालिका-६ मधील चिसापानी गढी परिसरात रस्त्यापासून सुमारे ७०० मीटर खोल दरीत कोसळली. जखमींपैकी दोघांची प्रकृती गंभीर आहे.

मिळालेल्या माहितीनुसार, या प्रवासी वाहनात १५ जण प्रवास करत होते. ही व्हॅन राजधानी काठमांडूहून दक्षिणेकडील सर्लाही जिल्ह्याचे मुख्यालय असलेल्या मलंगवा येथे जात होती. खडका यांनी सांगितले की, जखमींपैकी तिघांवर बागमती प्रांताची राजधानी हेटौडा येथील रुग्णालयात उपचार सुरू आहेत. अपघाताची माहिती मिळताच सुरक्षा कर्मचाऱ्यांना घटनास्थळी रवाना करण्यात आले.

खडका यांनी सांगितले की, अपघातस्थळाच्या परिसरात १२ मृतदेह आढळले. त्यापैकी १० जणांचा मृत्यू झाल्याची तातडीने पुष्टी करण्यात आली. दरम्यान, अपघाताचे नेमके कारण अद्याप स्पष्ट झालेले नाही.

---------------

हिंदुस्थान समाचार / Priyanka Bansode