मुंबई, 12 नोव्हेंबर, (हिं.स.)। नितेश तिवारी यांच्या 'रामायण' चित्रपटात राणी कैकेयीची भूमिका साकारणारी अभिनेत्री लारा दत्ता हिने तिच्या पात्राच्या वेशभूषेवर होत असलेल्या टीकेला उत्तर दिले आहे. चित्रपटाचा ट्रेलर प्रदर्शित झाल्यानंतर, सोशल मीडियावर काही लोकांनी अशी टिप्पणी केली होती की, तिची वेशभूषा त्रेतायुगाच्या तुलनेत खूपच आधुनिक वाटते. यावर प्रतिक्रिया देताना लारा म्हणाली की, प्रेक्षकांना त्यांचे मत मांडण्याचा पूर्ण अधिकार आहे, परंतु चित्रपटातील वेशभूषा एका विशिष्ट दृष्टिकोनातून आणि उद्देशाने निवडण्यात आली आहे.

एका मुलाखतीत लाराने स्पष्ट केले की, कैकेयी 'केकय' राज्याची होती, त्यामुळे तिचे दागिने आणि वेशभूषा ही कौसल्या आणि सुमित्रा या इतर राण्यांपेक्षा वेगळी असणे स्वाभाविकच होते. तिने असा प्रश्न उपस्थित केला की, कैकेयी आपल्यासोबत आपल्या राज्याच्या परंपरा आणि 'स्त्रीधन' (तिची वैयक्तिक संपत्ती किंवा वस्तू) अयोध्येत घेऊन आली नसेल का? अभिनेत्रीच्या मते, मिथिला, अयोध्या आणि लंका यांच्यातील सांस्कृतिक फरक अधोरेखित करण्यासाठी वेशभूषेचे एक वेगळे निकष ठरवण्यात आले होते. तिने नमूद केले की, छोट्या-छोट्या गोष्टींवर टीका केल्यास विविध चर्चा सुरू होऊ शकतात, परंतु चित्रपट निर्मात्यांनी त्यांच्या सर्जनशील दृष्टिकोनातून हे सादरीकरण तयार केले आहे.

लाराने यावर भर दिला की, एक कलाकार म्हणून दिग्दर्शक आणि निर्मात्यांच्या दृष्टिकोनाचा आदर करणे आवश्यक असते. तिने अंतिम चित्रपटाबद्दल आपला उत्साह व्यक्त करताना सांगितले की, जरी तिने स्वतः या चित्रपटाच्या सेटवर काम केले होते, तरीही पडद्यावर पूर्ण झालेला चित्रपट पाहून ती थक्क झाली. अभिनेत्रीने मान्य केले की, प्रेक्षकांना चर्चा आणि वाद करण्याचा पूर्ण अधिकार आहे, मात्र सर्जनशील प्रक्रियेदरम्यान कलाकाराने चित्रपट निर्मात्यांच्या दृष्टिकोनाशी सुसंगत राहणे गरजेचे असते.

---------------

हिंदुस्थान समाचार / हर्षदा गावकर