मुंबई, 12 नोव्हेंबर, (हिं.स.)। रणबीर कपूरचा 'रामायण: भाग १' हा चित्रपट बॉक्स ऑफिसवर अत्यंत यशस्वी ठरत आहे. ५ नोव्हेंबर रोजी प्रदर्शित झालेला हा चित्रपट अवघ्या सात दिवसांत देशांतर्गत बॉक्स ऑफिसवर ५०० कोटी रुपयांचा टप्पा ओलांडून पुढे गेला आहे. नितेश तिवारी दिग्दर्शित या पौराणिक महाकाव्याची सुरुवात ६४.८५ कोटी रुपयांच्या कमाईने झाली होती आणि आता हा चित्रपट नवीन विक्रम प्रस्थापित करण्याच्या दिशेने वाटचाल करत आहे.

'सॅकनिल्क' (Sacnilk) च्या आकडेवारीनुसार, सातव्या दिवशी चित्रपटाने ७०.६५ कोटी रुपयांचा व्यवसाय केला. बुधवारी १९,७१५ शोजच्या माध्यमातून, हिंदी आवृत्तीतून ५८ कोटी रुपये आणि इतर प्रादेशिक भाषांमधील आवृत्त्यांतून १२.६५ कोटी रुपयांची कमाई झाली. यासह, चित्रपटाचे देशांतर्गत निव्वळ संकलन ५११.१० कोटी रुपयांवर पोहोचले आहे. त्याच वेळी, सातव्या दिवशी परदेशातून २५ कोटी रुपयांची कमाई झाल्यामुळे, आंतरराष्ट्रीय स्तरावरील एकूण व्यवसाय ३२३.५० कोटी रुपयांवर पोहोचला आहे. परिणामी, चित्रपटाचे जागतिक स्तरावरील एकूण संकलन आता ९३४.५५ कोटी रुपये झाले आहे.

कमाईच्या बाबतीत, 'रामायण'ने विकी कौशलच्या 'छावा' चित्रपटाच्या ८०९ कोटी रुपयांच्या जागतिक जीवनकाल कमाईचा आकडा मागे टाकला आहे. देशांतर्गत स्तरावरही या चित्रपटाने रजनीकांत यांच्या 'जेलर २' (Jailer 2) चित्रपटाच्या ४७१.६५ कोटी रुपयांच्या कमाईला मागे टाकले आहे. आता हा चित्रपट 'धुरंधर २' (Dhurandhar 2) च्या १,१४९ कोटी रुपयांच्या जागतिक कमाईच्या आकड्याला गाठण्याच्या तयारीत आहे. या चित्रपटात रणबीर कपूर भगवान श्रीरामाच्या भूमिकेत, साई पल्लवी माता सीतेच्या भूमिकेत आणि यश रावणाच्या भूमिकेत दिसत आहेत.

---------------

हिंदुस्थान समाचार / हर्षदा गावकर