लष्कराच्या छावण्यांमध्ये भोजन, निवारा आणि वैद्यकीय सुविधांची व्यवस्था

गंगटोक, 13 नोव्हेंबर (हिं.स.) : सिक्कीमच्या पूर्व भागात झालेली जोरदार बर्फवृष्टी आणि कडाक्याच्या थंडीमुळे अडकलेल्या ९०० हून अधिक स्थानिक नागरिक आणि पर्यटकांची भारतीय लष्कराने सुरक्षित सुटका केली. प्रतिकूल हवामान आणि दुर्गम भौगोलिक परिस्थितीचा सामना करत लष्कराच्या जवानांनी बचावकार्य राबवून अडकलेल्या नागरिकांना मोठा दिलासा दिला.

भारतीय लष्कराच्या त्रिशक्ती कोअरकडून मिळालेल्या माहितीनुसार, पूर्व सिक्कीममध्ये मोठ्या प्रमाणात बर्फवृष्टी झाल्याने अनेक पर्यटक आणि स्थानिक नागरिक रस्त्यांवर अडकले होते. परिस्थितीचे गांभीर्य लक्षात घेऊन लष्कराच्या जवानांनी तातडीने बचाव मोहीम हाती घेतली आणि प्रभावित नागरिकांना सुरक्षित ठिकाणी पोहोचवण्यासाठी मदत केली.या बचाव मोहिमेदरम्यान ३०० हून अधिक वाहनांची सुरक्षित वाहतूक सुनिश्चित करण्यात आली. यामध्ये २५० हून अधिक पर्यटक वाहनांचा समावेश होता. त्यामुळे बर्फवृष्टीमुळे वाहतुकीत अडकलेल्या शेकडो पर्यटकांना आणि स्थानिक नागरिकांना दिलासा मिळाला.

लष्करी छावण्यांमध्ये भोजन आणि वैद्यकीय सुविधा

बचावकार्यादरम्यान अडकलेल्या नागरिकांसाठी भारतीय लष्कराच्या छावण्यांमध्ये विशेष व्यवस्था करण्यात आली होती. नागरिकांना थंडीपासून संरक्षण मिळावे यासाठी उबदार निवारा, भोजन तसेच आवश्यक वैद्यकीय मदत उपलब्ध करून देण्यात आली.अत्यंत प्रतिकूल हवामान, कडाक्याची थंडी आणि कठीण भौगोलिक परिस्थिती असूनही भारतीय लष्कराच्या जवानांनी बचावकार्य सातत्याने सुरू ठेवले. नागरिकांची सुरक्षितता सुनिश्चित करण्यासाठी जवानांनी दाखवलेल्या तत्परतेमुळे पूर्व सिक्कीममध्ये अडकलेल्या शेकडो नागरिकांना आणि पर्यटकांना मोठा दिलासा मिळाला.

------------------------------

हिंदुस्थान समाचार / मनीष कुलकर्णी