
मुंबई, २१ नोव्हेंबर, (हिं.स.) : 'दादासाहेब फाळके आंतरराष्ट्रीय चित्रपट महोत्सव पुरस्कार २०२६' सोहळ्यातील विजेत्यांची घोषणा करण्यात आली आहे. यावर्षी भारतीय चित्रपटसृष्टी, ओटीटी, दूरदर्शन आणि आंतरराष्ट्रीय मनोरंजन क्षेत्रातील अनेक दिग्गज कलाकारांना विविध श्रेणींमध्ये सन्मानित करण्यात आले.
रणवीर सिंगची मुख्य भूमिका असलेला 'धुरंधर' हा चित्रपट या सोहळ्यातील सर्वात मोठा विजेता ठरला असून, त्याने एकूण पाच पुरस्कार पटकावले आहेत. या चित्रपटाला 'सर्वोत्कृष्ट चित्रपट' (Best Film) हा बहुमान मिळाला, तर रणवीर सिंगला 'सर्वोत्कृष्ट अभिनेता' आणि आदित्य धरला 'सर्वोत्कृष्ट दिग्दर्शक' म्हणून गौरविण्यात आले. याशिवाय, आदित्य धर, ज्योती देशपांडे आणि लोकेश धर यांना 'प्रॉड्युसर ऑफ द इयर' (वर्षातील सर्वोत्तम निर्माते) म्हणून सन्मानित करण्यात आले. चित्रपटात नकारात्मक भूमिकेत दिसलेल्या अक्षय खन्नालाही 'सर्वोत्कृष्ट अभिनेता' (नकारात्मक भूमिका) हा पुरस्कार देण्यात आला.
'क्रिटिक्स' (समीक्षक) श्रेणीमध्ये 'कांतारा: चॅप्टर १' सर्वोत्कृष्ट चित्रपट ठरला, तर ऋषभ शेट्टीला याच चित्रपटासाठी 'सर्वोत्कृष्ट अभिनेता' (क्रिटिक्स) पुरस्कार मिळाला. 'हक' चित्रपटासाठी यामी गौतमला 'सर्वोत्कृष्ट अभिनेत्री' (क्रिटिक्स) म्हणून गौरविण्यात आले. तसेच, 'छावा' चित्रपटासाठी विनीत कुमार सिंगला 'सर्वोत्कृष्ट सहाय्यक अभिनेता' आणि 'हाऊसफुल ५' (Housefull 5) मधील अभिनयासाठी रितेश देशमुखला 'सर्वोत्कृष्ट विनोदी अभिनेता' म्हणून सन्मानित करण्यात आले.
वेब सीरिज श्रेणीमध्ये, आर्यन खानची पहिली वेब सीरिज 'द बॅड्स ऑफ बॉलीवूड' (The Bads of Bollywood) सर्वोत्कृष्ट वेब सीरिज ठरली, तर आर्यन खानला 'सर्वोत्कृष्ट दिग्दर्शक' म्हणून पुरस्कार देण्यात आला. 'पाताल लोक २' (Paatal Lok 2) साठी जयदीप अहलावतला 'सर्वोत्कृष्ट अभिनेता', तर 'दिल्ली क्राईम ३' (Delhi Crime 3) साठी शेफाली शहाला 'सर्वोत्कृष्ट अभिनेत्री' म्हणून गौरविण्यात आले. याच सीरिजमधील नकारात्मक भूमिकेसाठी हुमा कुरेशीलाही पुरस्कार मिळाला. 'ग्राम चिकित्सालय' (Gram Chikitsalaya) मधील अभिनयासाठी विनय पाठक यांना 'सर्वोत्कृष्ट सहाय्यक अभिनेता' म्हणून सन्मानित करण्यात आले.
आंतरराष्ट्रीय श्रेणीमध्ये, 'अवतार: फायर अँड ॲश' (Avatar: Fire and Ash) या चित्रपटाला 'सर्वोत्कृष्ट आंतरराष्ट्रीय फीचर फिल्म'चा पुरस्कार मिळाला. 'सिनर्स' (Sinners) चित्रपटासाठी मायकेल बी. जॉर्डनला 'सर्वोत्कृष्ट अभिनेता' आणि 'हॅमनेट' (Hamnet) साठी जेसी बकलीला 'सर्वोत्कृष्ट अभिनेत्री' म्हणून गौरविण्यात आले. तसेच, 'वन बॅटल आफ्टर अनदर' (One Battle After Another) या चित्रपटासाठी पॉल थॉमस अँडरसनला 'सर्वोत्कृष्ट दिग्दर्शक' हा पुरस्कार देण्यात आला. दरम्यान, टेलर स्विफ्टला 'इंटरनॅशनल आर्टिस्ट ऑफ द इयर' (आंतरराष्ट्रीय कलाकार) म्हणून सन्मानित करण्यात आले, तर जेम्स कॅमेरून यांना जागतिक चित्रपटसृष्टीतील त्यांच्या योगदानाबद्दल गौरविण्यात आले.
दूरदर्शन श्रेणीमध्ये, 'तारक मेहता का उल्टा चष्मा'ला 'टीव्ही सीरिज ऑफ द इयर' (वर्षातील सर्वोत्तम टीव्ही मालिका) म्हणून निवडण्यात आले. 'क्योंकि सास भी कभी बहू थी २' साठी अमर उपाध्याय आणि स्मृती इराणी यांना अनुक्रमे सर्वोत्तम अभिनेता आणि सर्वोत्तम अभिनेत्रीचे पुरस्कार देण्यात आले. संगीत क्षेत्रात, 'सैयारा' चित्रपटातील शीर्षक गीताला 'सॉन्ग ऑफ द इयर' (वर्षातील सर्वोत्तम गाणे) म्हणून घोषित करण्यात आले. याव्यतिरिक्त, शाश्वत सचदेव, फहीम अब्दुल्ला आणि इरशाद कामिल यांचाही सत्कार करण्यात आला. ज्येष्ठ अभिनेते कमल हासन यांना भारतीय चित्रपटसृष्टीतील त्यांच्या उल्लेखनीय योगदानाबद्दल विशेष सन्मानाने गौरविण्यात आले.
---------------
हिंदुस्थान समाचार / हर्षदा गावकर