
मुंबई, २१ नोव्हेंबर, (हिं.स.) — जिमी शेरगिल, अध्ययन सुमन आणि प्रनूतन बहल यांची मुख्य भूमिका असलेला आगामी सस्पेन्स थ्रिलर चित्रपट 'प्यादे'चा पहिला अधिकृत टीझर प्रदर्शित झाला आहे. या टीझरमध्ये जिमी शेरगिल आणि अध्ययन सुमन यांच्यातील एक तीव्र चौकशीचा (इंट्रोगेशन) प्रसंग दाखवण्यात आला आहे, जो चित्रपटाच्या कथानकाबाबत अनेक प्रश्न निर्माण करतो.
सत्ता, कटकारस्थान आणि रहस्यावर आधारित या चित्रपटातील पात्रे आपापले छुपे हेतू बाळगून आहेत. चित्रपटाची कथा अनेक अनपेक्षित वळणांनी भरलेली आहे. 'शायनिंग मून पिक्चर्स'च्या बॅनरखाली निर्मित हा चित्रपट ११ डिसेंबर २०२६ रोजी चित्रपटगृहांमध्ये प्रदर्शित होणार आहे.
टीझरची सुरुवात एका तणावपूर्ण चौकशी दृश्याने होते. यात जिमी शेरगिल एका अधिकार्याच्या भूमिकेत, तर अध्ययन सुमन संशयिताच्या भूमिकेत दिसत आहेत. त्यांच्यातील संवाद रहस्य अधिक गडद करत जातो; प्रत्येक उत्तरासोबत एक नवीन प्रश्न निर्माण होतो, ज्यामुळे कथेत दडलेल्या सत्याबद्दलची उत्सुकता वाढते. लेखक-दिग्दर्शक शेखर एस. झा यांच्या मते, हा चित्रपट मानवी वर्तन, वैयक्तिक स्वार्थ आणि स्वतःच्या कृतींचे परिणाम यांचा शोध घेतो. त्यांच्या म्हणण्यानुसार, हा चौकशीचा प्रसंग एका मोठ्या खेळाची केवळ सुरुवात आहे.
या चित्रपटाची निर्मिती रिंकू सिंग यांनी केली आहे, ज्यांनी यापूर्वी २०१९ मध्ये प्रियांशू चॅटर्जी अभिनीत 'लिटल बेबी' या चित्रपटाची निर्मिती केली होती. शेखर एस. झा यांनी लिहिलेल्या आणि दिग्दर्शित केलेल्या 'प्यादे'मध्ये जिमी शेरगिल, अध्ययन सुमन आणि प्रनूतन बहल मुख्य भूमिकेत आहेत. रहस्य आणि थराराने परिपूर्ण असलेला हा चित्रपट ११ डिसेंबर रोजी प्रेक्षकांच्या भेटीला येणार आहे.
---------------
हिंदुस्थान समाचार / हर्षदा गावकर