मुंबई, 04 नोव्हेंबर, (हिं.स.)। श्रद्धा, अध्यात्म, सनातन संस्कृती आणि विज्ञान यांच्यातील संबंधांवर भाष्य करणाऱ्या 'देवी विज्ञानम' या हिंदी चित्रपटाचा ट्रेलर जयपूरमधील 'कॉन्स्टिट्यूशन क्लब ऑफ राजस्थान' येथे प्रदर्शित करण्यात आला. या कार्यक्रमाला चित्रपटातील कलाकार टिकू तलसानिया, पूजा जोशी, के. आर्यवर्धन आणि चेतन धनानी यांच्यासह दिग्दर्शक कर्तव्य शाह आणि 'किंग प्रोडक्शन हाऊस'ची टीम उपस्थित होती.

दिग्दर्शक कर्तव्य शाह यांनी सांगितले की, हा चित्रपट श्रद्धा, सांस्कृतिक वारसा आणि वैज्ञानिक दृष्टिकोन यांच्यातील दुवा एका नाविन्यपूर्ण पद्धतीने मांडण्याचा प्रयत्न करतो. प्रेक्षकांना विचार करायला लावणारी आणि त्यांना त्यांच्या सांस्कृतिक मुळांशी पुन्हा जोडणारी कथा मांडणे हा यामागचा उद्देश आहे. टिकू तलसानिया यांनी नमूद केले की, या चित्रपटाचा विषय अत्यंत वेगळा आणि विचारप्रवर्तक आहे. पूजा जोशी यांनी या प्रकल्पाला आपल्या कारकिर्दीतील एक अविस्मरणीय अनुभव असल्याचे म्हटले आणि प्रेक्षक या चित्रपटातील कथा आणि भावनांशी नक्कीच जोडले जातील, अशी आशा व्यक्त केली.

'किंग प्रोडक्शन हाऊस'च्या बॅनरखाली निर्मित आणि कर्तव्य शाह दिग्दर्शित या चित्रपटात टिकू तलसानिया, पूजा जोशी, के. आर्यवर्धन आणि चेतन धनानी मुख्य भूमिकेत आहेत. निर्मात्यांनी दिलेल्या माहितीनुसार, 'देवी विज्ञानम' ४ डिसेंबर रोजी संपूर्ण भारतात चित्रपटगृहांमध्ये प्रदर्शित होणार आहे.

---------------

हिंदुस्थान समाचार / हर्षदा गावकर