पंख्यात शॉर्टसर्किट झाल्याने आग लागल्याची प्राथमिक माहिती

सुदैवाने जीवितहानी नाही, मात्र प्रवाशांचे सामान जळून खाक

राजपुरा, 06 नोव्हेंबर (हिं.स.) : अमृतसरहून पश्चिम बंगालमधील न्यू जलपाईगुडीकडे जाणाऱ्या कर्मभूमी एक्सप्रेस (गाडी क्रमांक 12408) मध्ये शुक्रवारी अचानक आग लागल्याची घटना घडली. या दुर्घटनेत रेल्वेचे चार डबे आगीच्या विळख्यात सापडल्याची माहिती समोर आली आहे. घटनेमुळे प्रवाशांमध्ये एकच खळबळ उडाली. खबरदारीचा उपाय म्हणून रेल्वे प्रशासनाने गाडी राजपुरा रेल्वे स्थानकाजवळ थांबवली.

मिळालेल्या माहितीनुसार, राजपुरा येथील सराय बंजारा परिसरात कर्मभूमी एक्सप्रेसच्या इंजिनपासून पाचव्या डब्यापर्यंत धूर निघताना दिसून आला. त्यानंतर काही डब्यांना आग लागल्याचे निदर्शनास आले. अचानक डब्यांमध्ये धूर पसरल्याने प्रवाशांमध्ये भीतीचे वातावरण निर्माण झाले. अनेक प्रवाशांनी आपला जीव वाचवण्यासाठी सामानासह डब्यांमधून बाहेर पडण्याचा प्रयत्न केला.

उत्तर रेल्वेचे मुख्य जनसंपर्क अधिकारी (CPRO) हिमांशू शेखर उपाध्याय यांनी दिलेल्या माहितीनुसार, सराय बंजारा स्थानकाजवळ रेल्वेची सुरक्षा यंत्रणा सक्रिय झाली. त्यामुळे गाडी सुरक्षितपणे थांबवण्यात आली. घटनेची माहिती मिळताच रेल्वेचे वरिष्ठ अधिकारी आणि संबंधित कर्मचारी घटनास्थळी दाखल झाले.

पंख्यातील शॉर्टसर्किटमुळे आग लागल्याचा प्राथमिक अंदाज

जीआरपीचे पोलीस निरीक्षक गुरप्रीत सिंह यांनी दिलेल्या माहितीनुसार, एका डब्यातील पंख्यात शॉर्टसर्किट झाल्यामुळे आग लागल्याचा प्राथमिक अंदाज आहे. सुरुवातीला एका डब्यात लागलेली आग हळूहळू इतर डब्यांपर्यंत पसरली. आग अधिक पसरू नये आणि इतर डब्यांचे नुकसान टाळता यावे, यासाठी रेल्वे प्रशासनाने आगीच्या विळख्यात सापडलेले डबे तातडीने गाडीपासून वेगळे केले.

आगीवर नियंत्रण मिळवण्यासाठी अग्निशमन दलाच्या गाड्या घटनास्थळी दाखल झाल्या. आग पूर्णपणे विझवण्यासाठी युद्धपातळीवर प्रयत्न करण्यात आले. या दुर्घटनेत सुदैवाने कोणतीही जीवितहानी किंवा प्रवासी जखमी झाल्याची माहिती समोर आलेली नाही. मात्र, सणासुदीच्या काळात आपल्या गावी निघालेल्या प्रवाशांचे सामान आगीत जळून खाक झाल्याने मोठे आर्थिक नुकसान झाले आहे.

रेल्वे वाहतुकीवर परिणाम; अनेक गाड्यांचे मार्ग बदलले

कर्मभूमी एक्सप्रेसमधील आगीच्या घटनेचा रेल्वे वाहतुकीवरही परिणाम झाला आहे. सानेहवाल (SNL) ते अंबाला (UMB) या मार्गावरील रेल्वे वाहतुकीत बदल करण्यात आला आहे. प्रवाशांची गैरसोय टाळण्यासाठी तसेच रेल्वे वाहतूक सुरळीत ठेवण्यासाठी काही गाड्या चंदीगड, सरहिंद आणि ललकार कलां या पर्यायी मार्गांवरून वळवण्यात आल्या आहेत.

मार्ग बदलण्यात आलेल्या प्रमुख गाड्या :

डाउन (Down) गाड्या :

गाडी क्रमांक 14680

गाडी क्रमांक 04652

गाडी क्रमांक 18104

गाडी क्रमांक 12920

गाडी क्रमांक 14674

अप (Up) गाड्या :

गाडी क्रमांक 12325

गाडी क्रमांक 05736

गाडी क्रमांक 14501

दरम्यान, रेल्वे प्रशासनाकडून संपूर्ण घटनेची चौकशी सुरू असून आगीचे नेमके कारण आणि नुकसानीचा तपशील तपासला जात आहे. प्रवाशांच्या सुरक्षिततेला प्राधान्य देत परिस्थिती नियंत्रणात आणण्यासाठी रेल्वे प्रशासनाकडून आवश्यक उपाययोजना करण्यात येत आहेत.-------------------------------

हिंदुस्थान समाचार / मनीष कुलकर्णी